Prezıdent «Sırıýs – Roza Hýtor» festıvaline qatysýshylardy quttyqtady
ASTANA. KAZINFORM - «Sırıýs» federaldyq aýmaǵynda balalar men jastarǵa arnalǵan «Sırıýs – Roza Hýtor» halyqaralyq óner festıvali jalǵasyp jatyr. Búgin festıval aıasynda «Astana Opera» memlekettik opera jáne balet teatrynyń baǵdarlamasy usynyldy.
QR Mádenıet jáne aqparat mınıstrligi baspasóz qyzmetiniń habarlaýynsha, teatr ujymy sahnaǵa shyǵar aldynda Qazaqstan Respýblıkasynyń Prezıdenti Qasym-Jomart Toqaevtyń festıvalge qatysýshylar men uıymdastyrýshylarǵa arnaǵan quttyqtaý haty oqyldy.
Memleket basshysy óz quttyqtaýynda festıvaldi Reseı men dostas memleketter arasyndaǵy mádenı baılanystardy nyǵaıtýǵa yqpal etetin mańyzdy gýmanıtarlyq joba dep baǵalady. Sondaı-aq is-shara óner maıtalmandary, jetekshi shyǵarmashylyq ujymdar men jas talanttardyń basyn qosqanyn erekshe atap ótti.
-Bul festıval mádenı-gýmanıtarlyq yntymaqtastyqty jańa deńgeıge kóterip, elderimiz arasyndaǵy dostyq pen jan-jaqty áriptestiktiń odan ári bekı túsýine serpin beredi dep senemin, – delingen Memleket basshysynyń quttyqtaýynda.
Festıval aıasynda «Astana Opera» memlekettik opera jáne balet teatrynyń ártisteri óner kórsetti. Teatr ujymy «Sırıýs» kontsert ortalyǵynyń bas sahnasynda frantsýz baletmeısteri Rolan Petıdiń horeografııasymen qoıylǵan Leo Delıbtiń «Koppelııa» baletin sahnalady.
Qoıylymǵa dırıjer Rýslan Baımýrzın jetekshilik etti. Basty partııalardy teatrdyń jetekshi solısteri Áıgerim Beketaeva, Arman Orazov jáne Oljas Tarlanov oryndady.
«Astana Operanyń» festıval aıasyndaǵy baǵdarlamasy 16 shildege deıin jalǵasady.
Kórermenge klassıkalyq jáne zamanaýı balet qoıylymdarymen qatar, teatr ártisteri men HasSak etno-folklorlyq ansambliniń qatysýymen ulttyq baǵdarlama usynylady.
Osyǵan deıin elimizde mádenıet jáne óner salasyna qandaı qoldaý kórsetiletini týraly jazdyq.
