Prezıdent Sırek kezdesetin metaldardy zertteıtin aımaqtyq ortalyq qurýdy usyndy

SAMARQAND. KAZINFORM – «Ortalyq Azııa - Eýropa Odaǵy» sammıtinde sóz sóılegen Prezıdent Qasym-Jomart Toqaev AstanadaSırek kezdesetin metaldardy zertteıtin aımaqtyq ortalyq qurýdy usyndy, dep habarlaıdy Kazinform agenttiginiń menshikti tilshisi Álıhan Asqar.

- Sırek kezdesetin metaldar salasyndaǵy yntymaqtastyq bolashaq is-qımyldardyń mańyzdy baǵyty sanalady. Qazaqstan Eýroodaqtyń ekonomıkasyna qajetti 34 shıkizattyń 19-yn shyǵarady. Onyń ishinde, ýran, tıtan jáne volfram bar. Biz Eýropalyq qaıta qurý jáne damý bankimen kelisim aıasynda gelologııalyq barlaý júrgizýge, taý-ken óndirisi salasyna ozyq tájirıbelerdi engizýge múddelimiz. Tolyq áleýetti paıdalaný úshin Astanada Sırek kezdesetin metaldardy zertteıtin aımaqtyq ortalyq qurýdy usynamyn, - dedi Prezıdent.

Memleket basshynyń aıtýynsha, qurylýy yqtımal ortalyqta ıgerýge qolaıly ken oryndary týraly aqparattar saqtalady. Tıisinishe, bul sheteldik ınvestorlar úshin tıimdi platforma bolmaq.

Aıta keteıik, Ózbekstannyń Samarqand qalasynda «Ortalyq Azııa - Eýropa Odaǵy» formatyndaǵy alǵashqy sammıt bastaldy.

Buǵan deıin Memleket basshysy Qasym-Jomart Toqaev «Ortalyq Azııa – Eýropa Odaǵy» sammıtine qatysý úshin «Kongress-ortalyqqa» kelgenin jazyp edik.

Buryn habarlaǵanymyzdaı, keshe Prezıdent Qasym-Jomart Toqaev Ózbekstanǵa jumys saparymen keldi. Onyń barysynda Memleket basshysy Eýropalyq keńes prezıdenti Antonıý Koshta, Eýropalyq komıssııa prezıdenti Ýrsýla fon der Lıaıen, Eýropalyq qaıta qurý jáne damý bankiniń prezıdenti Odıl Reno-Bassomen ekijaqty kezdesýler ótkizdi.