Prezıdent synynan keıin «Bolashaq» taǵylymdamasyna jas shekteýleri engizildi

ASTANA. KAZINFORM — «Bolashaq» baǵdarlamasy qoǵamnyń suranysy men Memleket basshysynyń usynystaryna qaraı únemi jańaryp otyrady.

Baǵdarlama shartyndaǵy jańashyldyqtar týraly «Halyqaralyq baǵdarlamalar ortalyǵy» AQ basqarma tóraǵasy Ádil Qusmanov Jibek joly telearnasyndaǵy «Ýáde» baǵdarlamasyna bergen eksklıýzıvti suhbatynda aıtyp berdi.

Ortalyq basshysy Ulttyq quryltaı otyrysynda Prezıdent synǵa alǵan 78 jastaǵy ǵylymı taǵylymdama qatysýshysy jóninde túsinikteme berdi.

— Ǵylymı taǵylymdama baǵdarlamasy aıasynda rasymen osyndaı oqıǵa boldy. Buǵan deıin biz úmitkerlerge jas boıynsha shekteý qoımadyq. Zeınet jasyna jetkender de ótinish bere alatyn. Prezıdent synynan keıin biz mınıstr buıryǵyna ózgeris engizdik. Endi ǵylymı taǵylymdama úshin er adamdarǵa — 59 jas, áıelderge — 57 jas mejesinde shekteý qoıyldy. Bul buıryq bekitilip, kúshine endi, — dedi Á. Qusmanov.

Sonymen birge, Ádil Qusmanov baǵdarlamanyń únemi jańǵyryp otyratynyn jáne 2025 jyldyń qańtarynda kezekti jańartýlar paketi engizilgenin atap ótti. Sonyń biri — qatysýshylardy irikteý qurylymynyń ózgerýi.

— Endi birinshi kezeńde keshendi testileý ótip, úmitkerler irikteledi. Onda mınımaldy ball belgiledik. Mysaly, matematıkadan sandyq test boıynsha 25 suraqtyń keminde 8-ine durys jaýap berilýi kerek. ıAǵnı, «Bolashaq» baǵdarlamasymen oqıtyn adam keminde 8 suraqqa durys jaýap berýi kerek dep esepteımiz, — dep túsindirdi ol.

Taǵy bir mańyzdy jańalyq — memlekettik qyzmetshiler úshin magıstratýra grantyn alýǵa bólek sanat engizildi. Alaıda, ortalyq basshysy atap ótkendeı, bul sanat úshin esh jeńildik qarastyrylmaıdy.

— Memlekettik qyzmetshiler bárimen teń básekege túsedi. Sol testterdi, sol emtıhandardy tapsyrady. Tek sońynda, irikteýden ótkennen keıin shetelde emes, óz elimizde tildik taǵylymdamadan ótý múmkindigi beriledi. Basqa jeńildik qarastyrylmaǵan, — deıdi Á. Qusmanov.

Jańa bastamalar qatarynda — «Bolashaq» túlekteriniń ǵylymı jáne analıtıkalyq jumystaryn jınaqtaıtyn derekqor qurý da bar.

— Biz «Bolashaq» túlekteriniń eńbekteri men analıtıkalyq jumystaryn jınaqtaǵymyz keledi, bul eńbekterdi memlekettik apparat reformalar men zańnamalyq bastamalardy ázirleýde qoldanǵanyn qalaımyz, — dedi basqarma tóraǵasy.

Sonymen birge, ǵylymı taǵylymdama úmitkerlerine qoıylatyn talaptar kúsheıtildi. Endi tek Web of Science, Scopus bazalarynda ındeksteletin nemese QR Ǵylym jáne joǵary bilim mınıstrligi Ǵylym komıteti bekitken tizimge engen basylymdar ǵana esepke alynady.

Buǵan deıin Ádil Qusmanov «Bolashaq» stıpendııasynyń tıimdiligi zerttelip jatqanyn málimdegen edi.