Prezıdent synynan keıin avıakerosın baǵasy qanshaǵa arzandaıdy

ASTANA. KAZINFORM – Energetıka mınıstri Erlan Aqkenjenov eldegi áýejaılarda avıaotyn baǵasyn tómendetý boıynsha qabyldanǵan sharalar týraly aıtyp berdi.

Ulttyq Quryltaıda Memleket basshysy avıaotyn baǵasy kórshi elderdegi áýejaılarmen salystyrǵanda tym qymbat ári básekege qabiletsiz ekenin aıtqan edi.

– Prezıdent tapsyrmasymen áýejaı habtaryn damytý aıasynda avıaotynnyń ushaqqa daıyn kúıdegi baǵasy tonnasy 1200 dollardan 940 dollarǵa deıin arzandatyldy, ári ony aldaǵy ýaqytta 890 dollarǵa deıin tómendetý josparlanyp otyr, – dedi Energetıka mınıstri Úkimet otyrysynda.

Mınıstrdiń aıtýynsha, bul otandyq áýejaılardyń básekege qabiletin jaqsartýǵa jáne «Air Atlanta», «Hungary Airlines», «One Air» sııaqty halyqaralyq avıakompanııalardyń reıster sanyn arttyrýǵa múmkindik berdi.

Atalǵan baǵyttaǵy jumys jalǵasady.

Eske sala ketsek, Prezıdent qazaqstandyqtardyń júrip-turý erkindigin arttyrýdy tapsyrdy.

Buǵan deıin Kólik mınıstri Nurlan Saýranbaev Vena, Rım, Shanhaı baǵytynda jańa áýe reısteri ashylatynyn aıtqan edi.