Prezıdent synynan keıin áleýmettik tólemder qysqartyla ma – Tamara Dúısenovanyń jaýaby

ASTANA. KAZINFORM – Premer-Mınıstrdiń orynbasary Tamara Dúısenova Úkimettiń keńeıtilgen otyrysynan keıin BAQ ókilderiniń suraǵyna bergen jaýabynda qaıta jasaqtalǵan Úkimet áleýmettik saıasatty qalaı júrgizetinin aıtty.

«Prezıdent áleýmettik tólemderdiń kólemin kóbeıtý arqyly halyq arasynda masyldyq qalyptastyrýǵa jol berilgenin aıtty. Bul áleýmettik tólemder qysqartylady degen sóz be?» - dep surady jýrnalıst.

Vıtse-Premer ondaı ustanym joq ekenin atap ótti.

«Joq. Jalpy Prezıdent memlekettik kómek muqtaj azamattarǵa berilý kerek degen basty qaǵıdatty ustap otyr. Ol óte durys dep oılaımyz. Sondyqtan búgingi tańda áleýmettik zańnamalarda qarastyrylǵan áleýmettik kómekterdiń sany eshqandaı kemimeıdi. Biraq taǵaıyndaǵan kezde muqtaj azamattarǵa berý máselesin, áleýmettik teńdikti qalyptastyrý máselesin qarastyryp otyrmyz. Sondyqtan biz negizinen kelgen azamattar muqtaj ba, muqtaj emes pe, soǵan kóbirek kóńil aýdaramyz», - dedi Tamara Dúısenova.

Úkimet basshysynyń orynbasary ataýly áleýmettik kómek alatyn halyqtyń sany keıingi 3-4 jylda 2 mıllıonnan 500 myńǵa deıin qysqarǵanyn aıtty.

«Esterińizde bolsa, budan 3-4 jyl aldyn 2 mln azamat ataýly áleýmettik kómek alǵan. Sonda tekserilgen kezde, onyń ishinde sizderdiń de kómekterińiz arqyly óte kóp azamattyń úı-jaıy bar ekenine, tabysy bar ekenine kóz jetkizgen bolatynbyz. Qazir bul másele jumys istep jatyr. Biraq mehanızmderin ári qaraı jetildiremiz. Ótken jyldyń esebin qarasańyz, 500 myńnan astam adam ataýly kómek alǵan. Sonda biz jáne jergilikti memlekettik organdar naǵyz muqtaj azamattardyń sanatyna kele jatyrmyz dep aıtýǵa bolady», - dedi ol.