Prezıdent syny: oblys ákimderi qarajatty tıimsiz jobalarǵa shashýdan árige barmaıdy

ASTANA. KAZINFORM — Jurttyń óńirlerden el astanasyna ne sebepti toqtaýsyz kóship jatqanyna muqııat taldaý júrgizip, áleýmettik jáne ekonomıkalyq turǵydan tartymdy basqa da ortalyqtar qurýǵa arnalǵan keshendi sharalar qabyldaý kerek. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty.

- Keıbir oblys ákimderi korporatıvti salyqtan túsken qarajatty kóshe boıyndaǵy tas taqtaıshalar salý sııaqty tıimsiz jobalarǵa shashýdan árige barmaıdy. Árıne, sodan soń jurt áleýmettik qyzmetteri men jeńildikteri bar Astanaǵa qaraı aǵylady. Mundaı ahýal kúrdeli máseleler týyndaýyna ákep soqtyrady. Qalada áleýmettik turǵydan osal toptaǵy jandardyń sany birneshe ese artqan, áleýmettik qoldaýǵa arnalǵan shyǵyndar da bıýdjet kirisinen jyldamyraq ósip jatyr. Al áleýmettik mindettemelerdiń úlesi tym artyp barady. Mektep ınfraqurylymy qazirdiń ózinde shamadan tys jumys istep, shatqaıaqtap tur. Jyl saıyn 15 mektepke deıin salý qajettigi týyndap jatyr. Emhanalardyń júktemesi óte kóp, onda oryn tapshy, - dedi Qasym-Jomart Toqaev.

Prezıdenttiń aıtýynsha, sonyń saldarynan ákimdik qalanyń qarqyndy damýyna jaǵdaı jasaýdyń ornyna áleýmettik shyǵyndarǵa qyrýar qarjy jumsaýǵa májbúr. Onyń qala bıýdjetindegi úlesi qazirdiń ózinde 60 paıyzǵa jetken. Bul ahýaldy túzeý úshin túbegeıli sharalar qabyldaý qajet.

- Jurttyń óńirlerden el astanasyna ne sebepti toqtaýsyz kóship jatqanyna muqııat taldaý júrgizip, áleýmettik jáne ekonomıkalyq turǵydan tartymdy basqa da ortalyqtar qurýǵa arnalǵan keshendi sharalar qabyldaý kerek. «Júrgenge jórgem ilinedi» degen qaǵıdatty engizip, óńirlerdiń áleýmettik mindettemelerin qarjylandyrý máselesin qaıta qaraǵan jón, - dedi Memleket basshysy.

Sondaı-aq Prezıdent Astanany sýmen jáne jylýmen qamtamasyz etetin júıelerdiń jumysyna qaýip tónip turǵanyn aıtty.