Prezıdent syny: mınıstrlik kýrorttyq aımaqtardy damytýdyń jol kartasyn ázirledi

ASTANA. KAZINFORM — Búginde týrızm salasyn damytý úshin zańnamany jetildirý jumysy júrip jatyr. Bul týraly Týrızm jáne sport mınıstri Erbol Myrzabosynov málim etti.

— Memleket basshysy kýrorttyq aımaqtardyń jazǵy týrıstik maýsymǵa daıyndyq deńgeıine nazar aýdardy. Tekserý nátıjesinde eleýli kemshilikter anyqtaldy, — dedi Erbol Myrzabosynov Úkimet otyrysynda.

Odan ári mınıstr kemshilikterdi tizip shyqty: 

— sanıtarlyq normalar tolyq saqtalmaǵan;
— týrısterdiń qaýipsizdigi jetkilikti qamtamasyz etilmegen;
— ınjenerlik ınfraqurylym men kadr jetispeıdi.

— Osy olqylyqtardy joıý úshin kýrorttyq aımaqtardy damytý jónindegi jol kartasynyń jobasy daıyndaldy. Sondaı-aq sheteldik týrısterdi tartý úshin Almaty taý klasterin damytýǵa arnalǵan keshendi jospar ázirlendi. Qujatta jeti baǵyt boıynsha 72 is-shara kózdelgen. Josparda taý klasteriniń jańa aımaqtaryn damytý bar. Sonymen qatar, «Shymbulaq» pen «Oı-Qaraǵaıdy» biriktiretin biryńǵaı taý-shańǵy júıesin qurý qarastyrylǵan, — deıdi ol.

Sondaı-aq vedomstvo basshysy týrızm salasyn damytý úshin zańnamany jetildirý jumysy qolǵa alynǵanyn tilge tıek etti. 

— Ákimdikterge eldi mekenderden tys aýmaqta, sonyń ishinde ulttyq parkterde týrıstik ınfraqurylym salý quqyǵy berildi. Fermerlerge aýyl sharýashylyǵy jerlerinde jeńil qurylystar men az qabatty qonaqúıler salyp, agrotýrızmmen aınalysý múmkindigi qarastyrylyp jatyr, — dep tolyqtyrdy mınıstr.

Mınıstrliktiń málimetinshe, týrızm salasyndaǵy negizgi kapıtalǵa salynǵan ınvestıtsııa kólemi 460 mlrd teńgeden asty. 

Aıta ketsek, bıyl shildede Memleket basshysy Qasym-Jomart Toqaev halyqtan kelip túsken kóptegen shaǵymǵa baılanysty Alakól mańyndaǵy áıgili týrıstik aımaqtyń demalýshylardy qarsy alýǵa daıyndyǵy tómen ekenine Úkimettiń nazaryn aýdarǵan bolatyn.