EAEO men Sıngapýr arasyndaǵy erkin saýda týraly kelisim ratıfıkatsııalandy

ASTANA. KAZINFORM – Memleket basshysy jańa zańǵa qol qoıdy. Bul týraly Aqordanyń baspasóz qyzmeti habarlady.

- Memleket basshysy «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Sıngapýr Respýblıkasy arasyndaǵy jan-jaqty ekonomıkalyq yntymaqtastyq týraly negizdemelik kelisimdi jáne Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Sıngapýr Respýblıkasy arasyndaǵy erkin saýda týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy, - delingen habarlamada.

Zańnyń mátini baspasózde jarııalanady.

Aıta keteıik, Senat otyrysynda Eýrazııalyq ekonomıkalyq odaq pen Sıngapýr Respýblıkasy arasyndaǵy erkin saýda týraly kelisimdi ratıfıkatsııalaýǵa arnalǵan zań maquldandy.

Senator Shákárim Buqtuǵutov bul zań Qazaqstanǵa shıki munaıdy Sıngapýrǵa bajsyz eksporttaýǵa múmkindik beretinin aıtty.

- Qazaqstan men Sıngapýr arasyndaǵy taýar aınalymy 2023 jyly 1,8 mlrd dollar boldy. Onyń ishinde Qazaqstannyń eksporty 1,7 mlrd bolsa, Sıngapýrdan tartylǵan ımport - 81 mln dollar. Qazaqstan Sıngapýrdan ushý apparattaryn, medıtsınalyq jabdyqtar men elektronıka buıymdaryn, dárilik zattardy ımporttaıdy. Al eksporttyń 99,9%-y shıki munaı. Sıngapýrdyń sońǵy 11 jylda Qazaqstanǵa salǵan tikeleı ınvestıtsııalarynyń jalpy kólemi 1,7 mlrd dollardan asty. Kelisim kúshine engen sátten bastap Sıngapýr taýarlaryn ákelý kezinde qoldanystaǵy barlyq tarıfterdi joıady jáne saýdanyń tarıftik, tarıftik emes shekteýlerin qoldanbaýǵa mindettenedi, - dedi depýtat.

Kelisim boıynsha, EAEO Sıngapýrdan keletin taýardyń 88%-yna bajsyz rejım usynady.

- Al Sıngapýr kelisim kúshine engen sátten bastap Qazaqstan men EAEO elderinen ákelinetin barlyq taýarlarǵa kedendik ákelý bajdaryn alyp tastaıdy, - dedi Shákárim Buqtuǵutov.

Buǵan deıin Prezıdent «Abý Dabıdiń ornyqty damý aptasy» sammıtiniń jumysyna qatysatynyn jazǵan bolatynbyz.