Prezıdent Sybaılas jemqorlyqqa qarsy is-qımyl agenttiginiń tóraǵasyn qabyldady
ASTANA. KAZINFORM - Prezıdent Agenttik tóraǵasynyń elimizdegi sybaılas jemqorlyqqa qarsy is-qımyl sharalary týraly esebin tyńdady.
Qasym-Jomart Toqaevqa joǵary laýazymdy tulǵalardyń qatysy bar qylmystardyń jolyn kesý jumystary jalǵasyp jatqany jóninde málimet berildi.
Ashat Jumaǵalıdyń aıtýynsha, vedomstvo 2022 jyldan bastap memleket pen kvazımemlekettik sektor sýbektilerine 1 trıllıon 90 mıllıard teńge somasynda múliktik aktıvter men qarajattyń qaıtarylýyn qamtamasyz etken. Bilim berý ınfraqurylymyn qoldaý qoryna 153,3 mıllıard teńge aýdarylǵan. Osy qarjyǵa qazirdiń ózinde 50-den astam mektep ashylǵan. Sondaı-aq taǵy 30 bilim oshaǵyn salý josparlanǵan.
Memleket basshysyna buǵan deıin bergen tapsyrmalarynyń oryndalý barysy týraly baıandaldy. Atap aıtqanda, Agenttik Ulttyq bankpen jáne Qarjy mınıstrligimen birlesip, «Tsıfrlyq teńge» platformasy arqyly júzege asyratyn «aqshany boıaý» jobasyn iske qosty. Ashat Jumaǵalı Prezıdent Joldaýynda júktegen mindetterge saı jol qurylysy men aýyl sharýashylyǵy salalarynda sybaılas jemqorlyqty joıý jumystary júrgizilip jatqanyn aıtty.
Sonymen qatar «Jaıly mektep» ulttyq jobasyna monıtorıng jasalyp jatyr. Tekserý barysynda qarajatty tıimsiz paıdalanýǵa jáne nysandardy tapsyrý ýaqytyn keshiktirýge sebep bolatyn sybaılas jemqorlyq táýekelderi taldanady.
Budan bólek, Qasym-Jomart Toqaevqa pedagogterdiń eńbekaqy qorynan mıllıardtaǵan qarjy jymqyrýǵa jol bergen sybaılas jemqorlyq faktorlaryn joıý sharalary týraly aıtyldy. Bıyl Agenttiktiń bastamasymen bıýdjet protsesterin avtomattandyrýǵa, Qazynashylyqty bilim berý mekemeleriniń esep júıelerimen ıntegratsııalaýǵa, tólem qujattaryna qol qoıý kezinde bıometrııany paıdalanýǵa baǵyttalǵan tsıfrlyq sheshimder engizildi.
Prezıdentke halyqaralyq qatynastar, kadr saıasaty, normatıvtik-quqyqtyq aktiler ázirleý protsesi sekildi vedomstvonyń basqa da basty baǵyttary boıynsha atqarylǵan jumystar týraly aqparat berildi.
Kezdesý sońynda Memleket basshysy elimizdegi sybaılas jemqorlyqpen kúresti kúsheıtý jóninde birqatar tapsyrma berdi.
