Prezıdent Sı Tszınpınmen kelissóz júrgizdi
ASTANA. KAZINFORM — Memleket basshysy Qasym-Jomart Toqaev Jasandy ıntellekt jónindegi konferentsııaǵa qatysýǵa shaqyrǵany úshin Tóraǵa Sı Tszınpınge alǵys aıtyp, osy is-sharanyń Shyǵystyń injý-marjany – Shanhaı qalasynda uıymdastyrylýy sımvoldyq mánge ıe ekenin jetkizdi.
Qasym-Jomart Toqaev QHR Tóraǵasyn Qytaı Kommýnıstik partııasynyń qurylǵanyna 105 jyl tolýymen quttyqtady.
– Qytaıdyń halyqaralyq qaýymdastyq aldyndaǵy bedeli zor jáne onyń jetistikterin búkil álem moıyndaıdy. Qazirgi tańda elińizde júzege asyrylyp jatqan aýqymdy ózgeristerdi bárimiz úlken qyzyǵýshylyqpen qaraımyz. Bul, eń aldymen, Sizdiń kóregen basshylyǵyńyz ben qajyrly eńbegińizdiń arqasy dep sanaımyn. Ózińizdi halqyn alǵa bastap kele jatqan tegeýrindi kóshbasshy jáne jahandyq deńgeıdegi parasatty saıasatker retinde erekshe qurmetteımin. Siz kótergen ıgi bastamalardy qoldaýǵa árqashan daıynbyz. Qazaqstan Qytaımen máńgilik ári strategııalyq seriktestikti jan-jaqty nyǵaıta berýge qashanda múddeli. Sońǵy jyldary memleketterimiz arasyndaǵy saıası dıalog aıtarlyqtaı jandana tústi, – dedi Qasym-Jomart Toqaev.
Prezıdenttiń aıtýynsha, taraptar saýda-ekonomıkalyq salada mol tabysqa qol jetkizdi.
Qytaı – Qazaqstannyń iri saýda seriktesi. Osy ýaqytqa deıin QHR elimizdiń ekonomıkasyna 30 mıllıard dollar ınvestıtsııa saldy. Byltyr ekijaqty saýda-sattyq kólemi 49 mıllıard dollarǵa jetti. Qazir Qazaqstanda 8,5 myńnan asa Qytaı kompanııasy jemisti jumys istep jatyr.
Ónerkásip, energetıka, gaz-hımııa, mashına jasaý jáne aýyl sharýashylyǵy sekildi ekonomıkanyń túrli sektorynda birlesken iri jobalar júzege asyrylýda.
Qasym-Jomart Toqaev mádenı-gýmanıtarlyq baılanys jyldan jylǵa nyǵaıyp kele jatqanyna toqtaldy
– Byltyr Qazaqstanǵa 1 mıllıonnan astam Qytaı azamaty saparlap keldi. Eki el astanalarynda mádenı ortalyqtar ashyldy. Elimizde Lý Ban sheberhanalary tabysty jumys isteýde. Bul – qos halyqtyń arasynda qalyptasqan dostyq pen ózara senimniń taǵy bir aıǵaǵy, – dedi Prezıdent.
Memleket basshysy halyqaralyq arenadaǵy yqpaldastyqtyń joǵary deńgeıine nazar aýdardy.
Eki memlekettiń jahandyq ornyqty damý jáne qaýipsizdikti qamtamasyz etý máselesine qatysty ustanymdary – ortaq. Atap aıtqanda, Birikken Ulttar Uıymy, Shanhaı yntymaqtastyq uıymy, Azııadaǵy ózara is-qımyl jáne senim sharalary jónindegi keńes, «Ortalyq Azııa – Qytaı» formaty aıasynda tıimdi baılanystar ornaǵan.
Aıta ketelik Qasym-Jomart Toqaev Qytaıdyń jetekshi kompanııalary basshylarymen kezdesken edi.
