Prezıdent shyrshasy: Aıaz ata aqtóbelik balalardyń tilegin oryndady
AQTÓBE. QazAqparat - Aqtóbe oblysynyń 200 oqýshysy Aıaz ataǵa hat jazyp, ózderine qajetti syılyqty surady. Búgin Prezıdent shyrshasynda olardyń tilekteri túgel oryndaldy, dep habarlaıdy QazAqparat tilshisi.
Aqtóbe qalasynda ótip jatqan Prezıdent shyrshasyna ár aýdan, aýyldan 200 oqýshy keldi. Olar ozat oqýshy, jetim balalar men ata-ananyń qamqorlyǵynsyz qalǵan oqýshylar, kópbalaly jáne az qamtylǵan otbasy músheleri. Bári aldyn ala Aıaz ataǵa hat jazyp, óz tilekterin jetkizdi. Arasynda qymbat telefon men teledıdar suraǵandary boldy. Keıbiri qýyrshaq, kitap, tipti, parta qajet dep tilegin aıtty.
«Prezıdent shyrshasyna kelgen balalar keshe qala ishin aralap, Shyǵarmashylyq ortalyǵyn, Hokkeı modýli men murajaıǵa, planetarııge bardy. Keıin túngi qalada shyrshany tamashalady. Balalardyń bári Aıaz ataǵa hat jazdy. Hattar óte qyzyqty. Keıbiri sińlisine qýyrshaq, ózine planshet suraǵan. Telefon, velosıped, taý velosıpedin qalaǵan balalar bar. Úıine qajetti parta, teledıdar surady. Aıaz ata olardyń tilegin túgel oryndady. Garrı Potterdiń kitabyn da aldy»,- dedi Aqtóbe oblystyq bilim basqarmasynyń basshysy Lázzat Orazbaeva.
Jalpy Aqtóbe oblysy boıynsha 22 myńnan astam bala túrli deńgeıde uıymdastyrylǵan shyrshaǵa qatysady. «Balalarǵa qýanysh syıla» aktsııasy ótkizilip, ár bala jańa jyldyq syılyq alady.
«Men planshet pen noýtbýk suradym. Ekeýi de meniń sabaǵyma kerek. Informatıka páninde paıdalanamyn. Armanym - ǵaryshker bolý. Men sabaqty jaqsy oqımyn. Al búgin barlyq balalardy, aýyldastarymdy Jańa jyl merekesimen quttyqtaımyn. Prezıdentimizge Jańa jyl molshylyq pen baqyt ákelsin!»,- Oıyl aýdany, Kúzembaı negizgi mektebiniń oqýshysy Mereı Qaıyrjanov.
Úıdiń kenjesi búgin óz tilegenine jetip, planshet aldy. Olardyń bári Prezıdent Nursultan Nazarbaevtyń tilegin tyńdap, óz alǵystaryn bildirdi.
Prezıdent shyrshasy kezinde oblys ákimi Berdibek Saparbaev balalardy Jańa jyl merekesimen quttyqtady.
