Prezıdent shyrshasy: Aqtóbelik búldirshinderge noýtbýk, telefon, dombyra tartý etildi
AQTÓBE. QazAparat - Prezıdent shyrshasyna qatysqan aqtóbelik oqýshylar suraǵan syılyǵyn aldy, dep habarlaıdy QazAqparat tilshisi.
Olarǵa telefon men teledıdar, velosıped, kompıýter men planshet, dombyra, kitap berildi.
Aqtóbede "Jarqyra, Qazaqstan! Jarqyra, týǵan jer!" atty jańa jyldyq kesh ótti. Prezıdent shyrshasyna barlyq aýdan, aýyldan 202 bala qatysty. Oqýda úzdik, alǵyr, erekshe kútimdi qajet etetin balalar shyrsha janynda asyr sap oınap, án aıtty.
"Balalar bir aı buryn Aıaz ataǵa hat jazyp, qalaǵan syılyǵy týraly aıtyp berdi. Oqýshylar teledıdar, kompıýter, telefon, fotoapparat surady. Barlyǵy da kitap alýdy qalady. Qyzdarymyz tigin mashınasyn surady. Daryndy balalar mektep-ınternatynyń oqýshysy Meırambek, Baıǵanın aýdanynan Kárim sheberdiń qolynan shyqqan dombyra qalady. Armandar oryndaldy. Astanalyq sheberler qyzyl aǵashtan jasaǵan dombyrany berip jiberdi", - dedi oblystyq bilim basqarmasynyń basshysy Lázzat Orazbaeva.
"Alısa ǵajaıyptar elinde" teatrlandyrylǵan kórinisti tamashalaǵan balalar Prezıdent quttyqtaýyn tyńdady.
"Bul ózderińdi jańa kúnge jeteleıtin, jańa úmit syılaıtyn erekshe meıram. Osy merekelik basqosýdy balalar asyǵa kútedi. Shyrsha toıynda balalardyń qýanyshynan artyq eshteńe joq. Balalardyń alańsyz ári baqytty ómir súrýi úshin biz barlyǵyn jasaımyz. Sanaly tárbıe men sapaly bilim alýǵa umtylǵan jón. Baldáýren balalyq baqytty shaqqa bólene berińder! Jańa jyl qutty bolsyn!" - dedi Preızent óz quttyqtaýynda.
Prezıdent shyrshasy kezinde balalar syılyqty oblys ákimi Berdibek Saparbaevtyń qolynan aldy.
"Sportpen, ónermen aınalysýǵa bar múmkindigi bolsyn dep balalarǵa barlyq jaǵdaı jasalyp jatyr. Balabaqsha, mektep, sport alańdary, óner ortalyǵy men ІT synyptar sizder úshin ashyldy. Jaqsy oqyp, sportpen, ónermen aınalysyp, óz qataryńnan, qurbylaryńnan qalmaý kerek", - dedi oblys ákimi Berdibek Saparbaev.
Aqtóbelik oqýshylar bar oıyn jıyp, hat jazdy. Máselen, Áıteke bı aýdany, Araltóbe aýylyndaǵy mektep oqýshysy Birjan Jastilek densaýlyǵyna baılanysty úıde oqıdy. Ol búgin noýtbýk aldy. Al Ersultan Bólekbaev uıaly telefonǵa ıe boldy. Áıteke bı aýdanyndaǵy Maǵjan Jumabaev atyndaǵy orta mektep oqýshysy Aıgerim Karkýlova Muqaǵalı Maqataevtyń óleńder jınaǵyn surady.
"Men aqynnyń óleńderin súıip oqımyn. Múmkindik týǵan kezde óleńder jınaǵyn suradym. Ózim de óleń shyǵarǵandy unatamyn. Qol saǵatyn da syıǵa aldym", - dedi Aıgerim Karkýlova.
Baıǵanın aýdanynan kelgen Kárim Qoshanovqa dombyra tartý etildi. Estý qabileti nashar bala ónerge jaqyn, qatarynyń aldy. Al Alǵadan kelgen 8-synyp oqýshysy Sandýǵash Esirkepova fotoapparatqa ıe boldy.
