Prezıdent «Shveıtsarııa – Qazaqstan» parlamenttik dostyq tobynyń múshelerimen kezdesti
ASTANA. KAZINFORM – Kezdesý barysynda Prezıdent Qazaqstan Eýropadaǵy ýaqyt tezinen ótken senimdi seriktesi sanalatyn Shveıtsarııamen uzaq jyldardan beri qalyptasqan qarym-qatynasqa erekshe mán beretinin atap ótti. Bul týraly Aqordanyń baspasóz qyzmeti habarlady.
Qasym-Jomart Toqaev 2021 jyly Shveıtsarııaǵa jasaǵan resmı sapary eki el arasyndaǵy seriktestikti nyǵaıtýǵa berik negiz qalaǵanyna nazar aýdardy.
Memleket basshysynyń aıtýynsha, shveıtsarııalyq depýtattar delegatsııasynyń elimizge kelýi jan-jaqty yqpaldastyqty odan ári damytýǵa qos taraptyń da nıetti ekenin kórsetedi.
Bul rette ózara túsinistikti nyǵaıtyp, ekijaqty yntymaqtastyqty jandandyrýda parlamenttik dıplomatııanyń mańyzdy ról atqaratynyna mán berildi.
«Shveıtsarııa – Qazaqstan» parlamenttik dostyq tobynyń úılestirýshisi Fılıppo Lombardı qonaqjaılyq tanytqany úshin Memleket basshysyna alǵys aıtyp, Shveıtsarııanyń seriktestik baılanystardy keńeıtýge jáne birlesken bastamalardy júzege asyrýǵa múddeli ekenin jetkizdi.
Kezdesýde Astana men Bern arasyndaǵy saýda-ınvestıtsııalyq yntymaqtastyq perspektıvasy, sondaı-aq halyqaralyq uıymdar aıasyndaǵy is-áreketterdi ózara úılestirý máseleleri talqylandy.
Aıta keteıik, Almaty men Shveıtsarııa arasyndaǵy saýda aınalymy 303 myń dollarǵa jetti.