Prezıdent Shuǵyla Ómirbekti áıelder kúresinen álem chempıonatynyń jeńimpazy atanýymen quttyqtady

ASTANA. KAZINFORM - Prezıdent Qasym-Jomart Toqaev Shuǵyla Ómirbekti áıelder arasyndaǵy kúresten U23 álem chempıonatynyń jeńimpazy atanýymen quttyqtady.

Bul týraly Aqordanyń baspasóz qyzmeti habarlady.

«Bul – tarıhı jeńis. Óıtkeni elimiz mundaı halyqaralyq jarysta alǵash ret altyn medal ıelenip otyr. Ár salada óziniń tabandylyǵymen, eńbekqorlyǵymen tabysqa jetetin jastardyń ósip kele jatqany qýantady. Shuǵylanyń aldaǵy ýaqytta da bıik belesterdi baǵyndyra berýine tilektestik bildiremin!»

Aıta keteıik, osyǵan deıin áıelder kúresinen Qazaqstan quramasynyń ókili Shuǵyla Ómirbektiń Serbııanyń Novı-Sad qalasynda ótip jatqan álem chempıonatynyń altyn júldesin alǵany týraly jazdyq.