Prezıdent Іshki ister mınıstrine «Zań jáne Tártip» qaǵıdatyn qamtamasyz etýdi tapsyrdy

Prezıdent Qasym-Jomart Toqaev Іshki ister mınıstri Erjan Sádenovti qabyldady, dep habarlaıdy Kazinform. 

Memleket basshysyna Qazaqstandaǵy krımınogendik jaǵdaı týraly baıandaldy.

Erjan Sádenov elimizde jasalatyn qylmystar sanynyń tómendeý dınamıkasy saqtalyp otyrǵanyn, kisi óltirý 20 paıyzǵa, urlyq 28 paıyzǵa, qaraqshylyq 32 paıyzǵa azaıǵanyn aıtty.

Sonymen qatar tonaý, buzaqylyq, mal urlyǵy, densaýlyqqa aýyr zııan keltirý faktileri, sondaı-aq basqa da qylmys túrleri tómendegenin baıandady. 

Prezıdentke quqyqbuzýshylyqqa múlde tózbeýshilik qaǵıdatyn qalyptastyrý, zańǵa qaıshy áreketter men qylmys jasaǵany úshin jazanyń bultartpastyǵyn iske asyrý, jol qaýipsizdigin qamtamasyz etý jumystary týraly málimet berildi. Búginde 8 mıllıon 500 myń zańǵa qaıshy áreket anyqtalǵan. Bul ótken jylmen salystyrǵanda 1 mıllıonǵa kóp. Jasalǵan quqyqbuzýshylyqtar úshin 90 mıllıard teńge kóleminde ákimshilik aıyppul salyndy, 71 mıllıard teńge óndirip alyndy.

Kezdesýde ishki ister organdarynyń jumysyn jetildirý, sonyń ishinde ІІO qyzmetkerlerin attestatsııadan ótkizip, vedomstvony laıyqsyz mamandardan tazartý sharalary týraly baıandaldy.

Kezdesý sońynda Qasym-Jomart Toqaev «Zań jáne Tártip» qaǵıdatyn qamtamasyz etý jóninde birqatar naqty tapsyrma berdi.

Memleket basshysy qoǵamda ádildik pen tártip ornatý úshin quqyq qorǵaý organdarynyń qyzmetkerlerine úlken jaýapkershilik júktelgenin aıtty.