Prezıdent Shymkent qalasynyń damý qarqyny týraly eseppen tanysty
ASTANA. KAZINFORM — Memleket basshysy Shymkent qalasynyń ákimi Ǵabıt Syzdyqbekovti qabyldady, dep habarlaıdy Aqordanyń baspasóz qyzmeti.
Qasym-Jomart Toqaev qalanyń áleýmettik-ekonomıkalyq damýy týraly esepti tyńdady.
Ǵabıt Syzdyqbekovtiń aıtýynsha, byltyr óńirlik jalpy ónim kólemi 5,7 trıllıon teńgege jetip, 11 paıyzǵa ulǵaıdy. Shymkent atalǵan kórsetkish arqyly óńirler arasynda ekinshi oryn ıelenip otyr.
— 2025 jyly shahar ekonomıkasyna 859,5 mıllıard teńge ınvestıtsııa quıyldy, onyń 72 paıyzy jekege tıesili. Jalpy ósim – 7,5 paıyz. Sońǵy úsh jylda ónerkásip salasynda quny 170 mıllıard teńge bolatyn 50 joba iske qosylyp, 3,5 myńnan astam jumys orny ashyldy. Belsendi kásipkerlik sýbektiler sany 133 myńǵa jetip, olar shyǵarǵan ónim kólemi 4,7 trıllıon teńgeni qurady. Onyń óńirlik jalpy ónimdegi úlesi 41 paıyzdan 56 paıyzǵa artty, — delingen habarlamada.
Prezıdentke bıylǵy tórt aıdyń qorytyndysy boıynsha negizgi áleýmettik-ekonomıkalyq kórsetkishterdiń oń dınamıkasy saqtalyp otyrǵany jóninde baıandaldy. Qysqa merzimdi ekonomıkalyq ındıkator 10,4 paıyzǵa ósti. Bul ónerkásip, qurylys, saýda jáne kólik salalarynda baıqaldy.
Memleket basshysyna buǵan deıingi tapsyrmalarynyń oryndalý barysy týraly aqparat berildi. Qazirgi ýaqytta 200 orynǵa shaqtalǵan zamanaýı perınataldyq ortalyq salynýda. Sondaı-aq bıyl 150 oryndyq ońaltý ortalyǵyn paıdalanýǵa berý josparlanǵan.
35 myń jankúıer syıatyn zamanaýı stadıon, paralımpıadalyq, sýrdlımpıadalyq sport túrleri men bochchaǵa arnalǵan mamandandyrylǵan keshen qurylystary júrgizilip jatyr.
Sonymen qatar bilim berý, densaýlyq saqtaý jáne turǵyn úı-kommýnaldyq sharýashylyq salalaryna jasandy ıntellekt tehnologııalaryn engizýge erekshe mán berilýde.
Memleket basshysy Shymkent qalasyn odan ári damytý jáne turǵyndardyń turmys sapasyn arttyrý baǵytynda birqatar naqty tapsyrma berdi.
Budan buryn Toqaev Bala quqyqtary jónindegi ýákil Dınara Zákıevany qabyldaǵanyn jazdyq.
