Prezıdent shetelden tynys alý apparattaryn jetkizgen qoǵam belsendilerine qoldaý bildirdi

NUR-SULTAN. QazAqparat – Prezıdent Qasym-Jomart Toqaev shetelden ókpeni jasandy jeldetý apparattary men kerekti dári-dármekti ákelgen qoǵam belsendilerine qoldaý bildirdi. Apparatty shetelden satyp alǵanymen belsendiler ony elge kirgizý problemasy boıynsha Memleket basshysynan kómek suraǵan bolatyn, dep habarlaıdy QazAqparat tilshisi.

Jalpy elge osynaý qıyn kezeńde kómek kórsetýge belgili dintanýshy Qaırat Joldybaıuly, aqyn Aınur Tursynbaeva, bloger ári jýrnalıst Dáýlet Muqaev, Janat Baqyt, Dınara Sátjan qatarly belsendi azamattar jumylǵan bolatyn. Osy azamattar arnaıy shot ashyp, halyqtan jylý jınaǵan. Túrkııa men Qytaıdan ókpeni jasandy jeldetý apparattary men dári-dármekti satyp alǵan olar osy kerek-jaraqty elge kirgizý máselesimen betpe-bet kelgen.

Aınur Tursynbaeva men Dáýlet Muqaev osy problemaǵa baılanysty Prezıdentten kómek suraǵan. Olardyń aıtýynsha bul kerek-jaraqtardy elge kirgizip, paıdalaný úshin «SQ-Farmatsııa» kompanııasynyń ruqsaty kerek bolǵan. Memleket basshysy belsendi azamattardyń únine qulaq asyp, olarǵa kómek berilý kerektigin tapsyrǵan. Qasym-Jomart Toqaevtyń qoǵam belsendilerine kómek beretinin baspasóz hatshysy Berik Ýálı rastady. Osylaısha Aınur Tursynbaeva men Dáýlet Muqaev Túrkııadan ókpeni jasandy jeldetýdiń 225 apparatyn óńir-óńirlerge taratpaq.

«Súıinshi! Qurmetti oqyrmandarym! Sanaýly saǵat ishinde bizdiń jan-aıqaıymyz Prezıdentke jetip, másele oń sheshimin tapty. Halyqtan jınalǵan aqshaǵa alynǵan ottegi apparattaryn biz ózimiz taratatyn boldyq. Bizdiń áleýmettik jelige jarııalaǵan postqa únsiz qalmaı, birden máseleni sheshýge kómektesken barsha azamatqa alǵysymyzdy bildiremiz», - dep jazdy Dáýlet Muqaev keshe keshke Instagram paraqshasyna.

Belsendiler qarajat jınap, óńirlerge kerek-jaraqty taratý isin jalǵastyratyndaryn aıtyp jatyr.