Prezıdent shetel kapıtalyn tartý jóninde: «Altyn vızany» engizýdiń mańyzy zor
ASTANA. KAZINFORM — Elimizdiń kóshi-qon saıasatyn jetildirý qajet. Bul týraly QR Quryltaıynyń birinshi sessııasynyń ashylýynda Memleket basshysy Qasym-Jomart Toqaev málim etti.
— Depýtattar birinshi sessııada birqatar mańyzdy zańdardy qabyldaýy qajet. Men osy jyly jasandy ıntellektini orta bilim berý salasyna engizý, tsıfrlyq aktıvter ındýstrııasyn damytý, Digital Qazaqstan strategııasy týraly birqatar Jarlyq shyǵardym. Úkimet osy baǵyttar boıynsha qajetti zań jobalaryn ázirlep, Parlamentke usynady. Taǵy bir másele. Biz elimizge kásibı turǵydan joǵary bilikti mamandardy, zamanaýı tehnologııalardy jáne shetel kapıtalyn kóptep tartý úshin júıeli sharalar qabyldap jatyrmyz. Bul iske tyń serpin berý úshin «Altyn vızany» engizýdiń mańyzy zor. Sonymen qatar elimizdiń kóshi-qon saıasatyn jetildirý qajet. Úkimet tıisti zań jobasyn Quryltaıǵa joldaýy kerek. Depýtattarymyz ony tezirek qaraǵany jón bolar, — dedi Qasym-Jomart Toqaev.
Sonymen qatar Prezıden bıyl Úkimet «Kitaphana jáne baspa isi týraly» zań jobasyn da ázirlep, Quryltaıǵa engizýi qajet ekenin aıtty. Bul — ultymyzdyń zııatkerlik áleýetin nyǵaıtý úshin qajetti qujat.
— Budan bólek, men taıaýda «Shámshi Qaldaıaqov» medali men «Qazaqstannyń eńbek sińirgen sýretshisi» qurmetti ataǵyn engizý jóninde tapsyrma berdim. Bul mártebeli marapattar ult mádenıetine qaltqysyz qyzmet etip, sonyń ishinde mýzyka jáne beıneleý ónerin damytýǵa eleýli úles qosqan azamattarǵa beriledi. Endi osy bastamanyń zańnamalyq negizin qalyptastyrý qajet, — dedi Memleket basshysy.
Aıta keteıik, búgin Astanada Prezıdenttiń qatysýymen birinshi shaqyrylymdaǵy QR Quryltaıynyń birinshi sessııasy ashyldy.
