Prezıdent shekaralyq eldi mekenderdiń ahýaly týraly: Strategııalyq mańyzy bar másele

ASTANA. KAZINFORM – Memleket basshysy Qasym-Jomart Toqaev ulttyq quryltaıda shekaralyq eldi mekenderdiń problemasyn atap ótti.

- Biz 2022 jyly jańadan úsh oblys quryp, osy óńirlerdiń damýyna kúshti serpin berdik. Bul aqyry durys sheshim boldy. Áleýmettik-ekonomıkalyq kórsetkishter edáýir artty, aımaqtarǵa ınvestıtsııa kele bastady. Sonyń arqasynda jergilikti turǵyndardyń turmys sapasy da jaqsara tústi. Degenmen Úkimet jańa oblystardyń ahýalyn baqylaýda ustaýǵa tıis. Olarǵa kómektesý qajet. Meniń tapsyrmammen Abaı jáne Shyǵys Qazaqstan oblystarynda shekara mańyndaǵy birneshe aýdan qalpyna keltirildi. Muny jurt óte jaqsy qabyldady, - dedi Qasym-Jomart Toqaev ulttyq quryltaıda. 

Memleket basshysynyń aıtýynsha, jańa aýdandarda tirshilik jandanyp, ınfraqurylym jaqsara bastady.

- Aýyldy damytý tujyrymdamasynda shekaralyq aýmaqtarǵa qatysty jumystyń negizgi baǵdary aıqyndalǵan. Shetkeri jatqan eldi-mekenderdiń ahýaly el irgesiniń bekem bolýyna tikeleı áser etedi. Bul – strategııalyq mańyzy bar másele. Sondyqtan osy baǵyttaǵy jumysty júıeli túrde jalǵastyrý kerek,- deıdi Prezıdent. 

Buǵan deıin Qasym-Jomart Toqaev ulttyq quryltaıda qazaq halqyn danyshpan dep aıtsaq, qatelespeımiz degen bolatyn. 

Sondaı-aq Prezıdent elimizde Abaı ınstıtýtyn quryp, seriktes elderde tól mádenıetimizdi nasıhattaıtyn ortalyqqa aınaldyrýdy tapsyrdy.