Prezıdent Shanhaı yntymaqtastyq uıymynyń Bas hatshysy Nurlan Ermekbaevty qabyldady
ASTANA.KAZINFORM — Memleket basshysy Shanhaı yntymaqtastyq uıymynyń Bas hatshysy Nurlan Ermekbaevty qabyldady. Bul týraly Aqorda málim etti.
Prezıdentke ShYU-nyń qazirgi qyzmeti men basym baǵyttary jóninde aqparat berildi.
Qasym-Jomart Toqaev Uıymnyń ereksheligine toqtalyp, onyń saıası, ekonomıkalyq jáne mádenı salalardaǵy ózara yqpaldastyqty arttyrýda áleýeti zor ekenin atap ótti. Prezıdenttiń aıtýynsha, aımaqtyq jáne jahandyq qaýipsizdikti qamtamasyz etý máselesine basa nazar aýdarylady.
Memleket basshysy Uıymnyń jumysyn odan ári jetildirý, halyqaralyq birlestiktermen baılanysyn jandandyrý, sondaı-aq Qazaqstannyń usynysymen ShYU-da qabyldanǵan «Ádil álem, kelisim jáne damý jolyndaǵy jahandyq birlik týraly» bastamany ilgeriletý mańyzdy ekenin jetkizdi.
Shanhaı yntymaqtastyq uıymyna múshe memleketter basshylary keńesiniń sheshimimen Nurlan Ermekbaev 2025 jyldyń 1 qańtarynan bastap ShYU Bas hatshysy qyzmetine kirisken bolatyn.
Eske sala keteıik, buǵan deıin Memleket basshysy Qasym-Jomart Toqaev «Ana tili» gazetine suhbat bergenin jazǵan bolatynbyz.