Prezıdent shahmatshy Jansaıa Ábdimálikti «Qurmet» ordenimen marapattady
«Eń jas halyqaralyq grossmeıster, shahmatshy Jansaıa Ábdimálik pen belgili opera ánshisi Zarına Altynbaeva «Qurmet« ordenimen marapattaldy. Belgili telejúrgizýshiler, jýrnalıster Zeıin Álipbek pen Vera Zaharchýkke de «Qurmet« ordeni beriledi», - dedi Qasym-Jomart Toqaev memlekettik nagradalardy tabystaý rásiminde.
Sondaı-aq, «Qurmet» ordenimen Pavlodar qalasynyń daryndy balalarǵa arnalǵan gımnazııasynyń dırektory Qorlan Quspekova, Kókshetaý qalasynyń kópsalaly aýrýhanasy nevrologııa bóliminiń meńgerýshisi Maqshárip Martazanov, Almaty qalasyndaǵy ekinshi klınıkalyq aýrýhanasynyń bas dárigeri, joǵary bilikti neırohırýrg Marat Rabandııarov marapattalady.
«Olar eń mańyzdy mamandyqtardyń – muǵalimder men dárigerlerdiń jarqyn ókilderi. Olar ózderiniń kásibıligimen jáne jasampaz eńbekterimen gýmanıtarlyq áleýetti arttyrady jáne ult densaýlyǵyn nyǵaıtady», - dedi Prezıdent.
Sonymen birge, «Kókshetaý qalasy joǵary tehnıkalyq kolledji» MKQK jetekshisi Aqnur Eslámova, Shymkent qalasynan kelgen eńbek ardageri Baıan Jandosova, SQO qıyn jaǵdaıǵa ushyraǵan balalardy qoldaý ortalyǵynyń dırektory Elemes Qalıev jáne Qyzylorda oblysy Qazaqstan sýretshiler odaǵynyń tóraǵasy Amangeldi Kenenbaev Prezıdent qolynan «Parasat» ordenin aldy.
Aıta keteıik, QR Táýelsizdiginiń 30 jyldyǵy qarsańynda Memleket basshysynyń Jarlyǵymen elimizdiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi, belsendi qoǵamdyq qyzmeti úshin bir top azamat memlekettik nagradalarmen marapattaldy.
