Prezıdent Semeıdegi eskertkish týraly: Bul – ustaz ben shákirt, aǵa men ini arasyndaǵy rýhanı birliktiń sımvoly

SEMEI. QazAqparat - Memleket basshysy Semeıdegi Muhtar Áýezov pen Qaıym Muhamedhanovqa arnalǵan eskertkishtiń ashylý rásiminde sóz sóıledi, dep habarlaıdy QazAqparat Aqordaǵa silteme jasap.

«Bul – ustaz ben shákirt, aǵa men ini arasyndaǵy rýhanı birliktiń sımvoly. Shyn máninde, qos alypty bóle-jaryp qaraý múmkin emes. Olar Abaı murasyn zerttep, dáripteýge ólsheýsiz eńbek sińirdi. Tól ádebıetimizdi jańa beleske kóterdi. Muhtar Áýezov Abaıdy, Abaı arqyly qazaqty búkil álemge tanytty. Uly oıshyldyń kórkem beınesin somdap, onyń asyl murasyn adamzattyń ortaq qazynasyna qosty. Jazýshynyń ár týyndysy jurtymyzdyń júreginen óshpes oryn aldy. Muhtar Áýezov – álem ádebıetiniń shyńyna kóterilgen qalamger. Al Qaıym Muhamedhanov – uly jazýshynyń jaqyn serigi ári shákirti. Ol búkil ǵumyryn Abaıtaný, Shákárimtaný jáne Alashtaný ǵylymyna arnady. Qýǵyn-súrginge ushyrasa da, taǵdyrdyń synaǵyna qarsy turyp, eline adal qyzmet etti», - dedi QR Prezıdenti.

Eske salsaq, búgin Prezıdent Semeıde Muhtar Áýezov pen Qaıym Muhamedhanovqa arnalǵan eskertkishti ashty.

Memleket basshysy jumys saparymen Abaı oblysynda júr.