Prezıdent Semeı qalasyn damytý baǵdarlamasyn ázirleýdi tapsyrdy
SEMEI. QazAqparat - 2025 jylǵa deıin Semeı qalasyn damytýdyń arnaıy baǵdarlamasyn ázirleý qajet. Bul týraly Memleket basshysy Qasym-Jomart Toqaev Semeı qalasynyń zııaly qaýym ókilderimen kezdesýinde aıtty, dep habarlaıdy QazAqparat QR Prezıdentiniń baspasóz hatshysy Berik Ýálıge silteme jasap.
«Elbasy barlyq ýaqytta da sizderdiń qalalaryńyzdy damytýǵa aıryqsha nazar aýdaryp keldi. Ózderińizde bilesizder, 2017 jyly Semeı qalasyn áleýmettik-ekonoıkalyq damytýdyń bes jyldyq keshendi baǵdarlamasy aıaqtaldy. Ony júzege asyrý qalanyń, irgeles eldi mekenderdiń kommýnaldyq jáne áleýmettik ınfraqurylymynda oń ózgeristerge qol jetkizýge, jylýmen jabdyqtaý jáne abattandyrýdy jaqsartýǵa múmkindik berdi. Qala turǵyndary ómiriniń laıyqty sapasyn qamtamasyz etý munan ary da bizdiń negizgi maqsatymyz bolyp qala beredi», - dedi Memleket basshysy.
QR Prezıdentiniń dereginshe, 350 myń turǵyny bar qalanyń jyldyq bıýdjeti ne bári 56,6 mlrd teńgeni ǵana qurap otyr.
«Sondyqtan oblys basshylyǵyna 2025 jylǵa deıin Semeı qalasyn damytýdyń arnaıy baǵdarlamasyn ázirleýge bastamashylyq jasaýdy tapsyramyn. Bul qala damýynyń mindetterin qysqa merzimdi keleshekte ózektendirýge múmkindik jasaıdy. Baǵdarlama ekonomıka men áleýmettik saladaǵy ósimniń jańa serpinin beredi», - dedi Q.Toqaev.
Memleket basshysy Semeı qalasynda iri mashına jasaý kásiporyndary jumys isteıtindigin, «Semaz» avtobýstar, traktorlar men arnaıy avtomobılderdi shyǵaratyndyǵyn aıtty.
«Semeıdiń ónerkásiptik áleýetin barynsha belsendi paıdalaný qajet. Úkimet pen barlyq óńirlerdiń ákimderine otandyq tehnıkalalardy satyp alýdy arttyrý múmkinshiligin zerdeleýdi tapsyramyn», - dedi QR Prezıdenti.
Eske sala keteıik, Qazaqstan Prezıdenti Qasym-Jomart Toqaev Shyǵys Qazaqstan oblysyna jumys saparyn Semeı qalasynan bastalǵandyǵy týraly habarlaǵan bolatynbyz.
