Prezıdent: Semeı elimizdiń qarqyndy damýynyń taǵy bir polıýsi bolady

ASTANA. QazAqparat – Semeı elimizdiń qarqyndy damýynyń taǵy bir polıýsi bolady. Bul týraly Memleket basshysy Qasym-Jomart Toqaev Abaı oblysy jurtshylyǵymen kezdesýinde aıtty, dep habarlaıdy QazAqparat tilshisi.

«Biz Ádiletti Qazaqstan – barshaǵa teń múmkindikter elin quryp jatyrmyz. Árbir azamat turǵylyqty jerine qaramastan laıyqty ómir súrýge jáne tolyqqandy ózin-ózi júzege asyrýǵa quqyly. Óıtkeni jalpyulttyq baılyq eldiń barlyq turǵyndarynyń eńbegi men kúsh-jigeriniń arqasynda qurylady. Memlekettiń shynaıy qýaty óńirlerde qalyptasatyndyǵyna senimdimin. Sondyqtan «Qýatty aımaqtar - qýatty el« qaǵıdaty meniń saıası baǵytymnyń negizgi negizderiniń birine aınaldy», - dedi Memleket basshysy.

QR Prezıdenti Abaı oblysyn qurý týraly sheshim kezdeısoq jáne jaǵdaıatqa baılanys emes ekendigin basa aıtty.

«Bul jalpy qoǵamnyń úmitine ǵana emes, strategııalyq esepteýlerge de baılanysty muqııat tekserilgen qadam boldy. Naqty ákimshilik-aýmaqtyq reforma aıasynda biz búkil Shyǵys Qazaqstannyń tarıhı ortalyǵyn qaıta qurdyq. Zamanynda Semeı halyqaralyq tranzıttik saýdanyń mańyzdy toraby boldy. Al búginde oblys eki iri kórshimiz – Reseı men Qytaımen shekaralasyp, eldiń shyǵys óńirlerin birtutas baılanystyrady. Osynaý orasan zor kóliktik-logıstıkalyq jáne saýda-ekonomıkalyq áleýetti tolyq paıdalaný qajet.

Bolashaqta Semeı Astana, Almaty, Shymkent jáne Aqtóbemen qatar belsendi adamdardy, ınnovatsııalar men ınvestıtsııalardy tarta otyryp, elimizdiń qarqyndy damýynyń taǵy bir polıýsi bolady dep sanaımyn», - dedi Qasym-Jomart Toqaev.

Foto:t.me/bort_01