Prezıdent segizinshi shaqyrylym depýtattarynyń jumysyna baǵa berdi
ASTANA. KAZINFORM – Memleket basshysy Qasym-Jomart Toqaev Parlament palatalarynyń birlesken otyrysynda depýtattyq korpýs azamattarmen ashyq ári tıimdi baılanys júıesin qalyptastyrǵanyn málimdedi.
– Segizinshi shaqyrylym depýtattary Úkimetke 2 myńnan astam saýal joldady. Sondaı-aq 31 Úkimet saǵatyn jáne 9 Parlament tyńdaýyn ótkizdi. Qos palatanyń komıtetteri belsendi ári jemisti jumys istedi.
Bir palataly Quryltaı júıesine kóshken soń zań shyǵarýshy organnyń komıtetteri de memleket saıasatynyń basym baǵyttaryn negizge ala otyryp, qurylǵany jón.
Osy jyldar ishinde depýtattyq korpýs azamattarmen ashyq ári tıimdi baılanys júıesin qalyptastyrdy.
Atap aıtqanda, partııa jobalaryn tabysty júzege asyrdy. Sondaı-aq turaqty túrde aımaqtarǵa baryp, jurtshylyqpen kezdesip otyrdy. Qoǵamdyq qabyldaýlar kezinde azamattardyń talap-tilekterin nazarǵa alyp, ózekti máselelerdiń sheshim tabýyna yqpal etti, – dedi Prezıdent.
Onyń aıtýynsha, Parlament bedeldi ǵalymdardy, baıypty sarapshylardy jáne qoǵam belsendilerin ortaq múddege biriktirgen ortalyqqa aınaldy.
Al Senat janyndaǵy sarapshylar klýby men Májilis janyndaǵy qoǵamdyq palata osy biregeı zııatkerlik ekojúıeniń berik tiregi boldy. Bul qurylymdar syndarly dıalogty damytyp, zań jobalaryn jan-jaqty taldaýǵa jol ashty.
Aıta keteıik, buǵan deıin Prezıdent «Derekterdi óńdeý ortalyqtary alqabyn» udaıy qadaǵalap otyratynyn jazǵanbyz.
