Prezıdent saılaýynyń naqty nátıjesi qashan shyǵady
Buǵan deıin QR Ortalyq saılaý komıssııasy Prezıdent saılaýynyń aldyn ala nátıjesin jarııalaǵan edi.
«Qazaqstan Respýblıkasyndaǵy saılaý týraly Konstıtýtsııalyq zańǵa sáıkes, aýmaqtyq saılaý komıssııalary daýystar sanalǵannan keıin eki kún ishinde ár óńir boıynsha hattamalardyń túpnusqalaryn jetkizýge tıis. Bıylǵy 20 qarashada ótken kezekten tys prezıdenttik saılaýdyń qorytyndylary Ortalyq saılaý komıssııasynyń otyrysynda bekitiledi, ony ótkizetin kún men ýaqyt qosymsha habarlanatyn bolady», - dedi Nurlan Ábdirov Ortalyq saılaý komıssııasynda ótken baspasóz máslıhatynda.
Sondaı-aq, N. Ábdirov Ortalyq saılaý komıssııasy men aýmaqtyq saılaý komıssııalarynyń atyna kelip túsken resmı jáne barlyq ótinishter zańnamada belgilengen tártippen qaralatynyn aıtty.
Qazirgi ýaqytta el óńirleri men shetelderdegi saılaý ýchaskelerinde daýystardy sanaý aıaqtaldy. Ázirge aýmaqtyq saılaý komıssııalary daýys berý nátıjeleri týraly hattamalardyń elektrondy kóshirmelerin usynǵan.
Osylaısha OSK tóraǵasynyń aıtýynsha, Q.Toqaevqa 6 mln 456 myń 392 saılaýshy nemese olardyń 81,31%-y daýys bergen. Ekinshi orynda 460 484 nemese 5,8% daýyspen «bárine qarsymyn» baǵany tur.
Sonymen birge, Jıgýlı Daırabaevqa – 271 641 adam nemese 3,42 paıyz, Qaraqat Ábdenge – 206 myń 206 nemese 2,6 paıyz, Meıram Qajykenge – 200 907 nemese 2,53 paıyz, Nurlan Áýesbaevqa – 176 116 nemese 2,22 paıyz jáne Saltanat Tursynbekovaǵa – 168 731 nemese 2,12 paıyz daýys berilgen.
Aıta keteıik, keshe 20 qarashada elimizde kezekten tys prezıdent saılaýy ótti. Barlyq óńirde 10 033 ýchaske jumys istedi. Al shet memleketterdegi Qazaqstan ókildikteri janyndaǵy 68 ýchaske qurylǵan.
Elimizdegi búkil saılaýshylardyń 69 paıyzy nemese 8 mln 282 myńnan astam adam óz tańdaýyn jasaǵan.
Sonymen birge, túnde Exit poll ádistemesi boıynsha júrgizilgen saýalnamalardyń alǵashqy qorytyndylary málim boldy.
