Prezıdent saılaýynyń qorytyndysy 9 sáýirden keshiktirilmeı anyqtalýy tıis - OSK
ASTANA. 4 aqpan. QazAqparat /Aıdar Ospanalıev/ - Ortalyq saılaý komıssııasy aǵymdaǵy jylǵy 3 sáýirde ótetin kezekten tys Prezıdenttik saılaýdyń qorytyndysyn 9 sáýirden keshiktirmeı anyqtaýy jáne tıisti qaýly qabyldaýy tıis.
Bul týraly búgin Ortalyq saılaý komıssııasynyń otyrysynda atalmysh komıssııa tóraǵasy Qýandyq Turǵanqulov aıtty.
Tóraǵanyń sózine qaraǵanda, saılaýshylardyń tolyq jáne dál tizimderin jergilikti atqarýshy organdar tıisti saılaý komıssııalaryna 13 naýryzdan keshiktirmeı joldaýy tıis. Al 18 naýryzdan bastap, tizimder azamattardyń tanysýy úshin usynylady. Azamattar saılaýshylar tizimine turǵylyqty jeri boıynsha engiziledi. «Eger ol tirkeý ornynan basqa jaqqa ketetin bolsa, 18 naýryz ben 2 sáýir kúngi saǵat 18-00-ge deıin óziniń ýchaskelik saılaý komıssııasyna baryp, daýys berý quqyǵyn beretin esepten shyǵarý kýáligin berý týraly ótinish bildire alady. Daýys berý 3 sáýir kúni jergilikti ýaqyt boıynsha, tańǵy saǵat 7-00-den keshki saǵat 20-00-ge deıin júredi»,-dedi OSK tóraǵasy.
