Prezıdent saılaýynda múmkindigi shekteýli jandar qalaı daýys beredi

ASTANA. QazAqparat – 20 qarashada ótetin prezıdent saılaýy kezinde múgedek jáne erekshe kútimdi qajet etetin jandarǵa jaǵdaı jasaý týraly qaýly bekitildi, dep habarlaıdy QazAqparat tilshisi.

«Jergilikti atqarýshy organdar daýys berýge arnalǵan ǵımaratqa kireberiste tutqa, pandýs, sondaı-aq basqa da qajetti kerek-jaraqty (ýaqytsha ǵana ruqsat etiledi) qarastyrýy tıis. Daýys berýge arnalǵan ǵımarat múgedek jandar úshin barynsha qoljetimdi bolýy qajet. Múmkindiginshe daýys berý kabınalary ǵımarattyń birinshi qabatynda ornalasqany jón. Al joǵary qabatta bolsa, múgedek azamattardyń kóterilýine jaǵdaıy jasalýy tıis», - dedi ortalyq saılaý komıssııasynyń múshesi Anastasııa Şegortsova.

Osylaısha OSK músheleri prezıdent saılaýy kezinde elimizdiń barlyq óńirinde múgedek jandarǵa jaǵdaı jasaý týraly qaýly qabyldady.

«Daýys berý ǵımaratynda tirek-qımyl apparatynyń fýnktsııalary buzylǵan saılaýshylardyń, onyń ishinde kreslo-arba paıdalanatyn adamdarǵa jaǵdaı jasaý maqsatynda jasyryn daýys berýge arnalǵan kabınanyń dıagonali keminde 54 sm bolýy kerek jáne monıtorly kompıýteri bar múgedek adamdar úshin arnaıy jabdyqtalǵan oryn kózdelýi qajet. Onda múgedektigi bar adamdarǵa beıimdelgen formatta saılaý týraly aqparat, qulaqqaptar, qosymsha jaryqtandyrý qarastyrylady», - deıdi ol.

Sondaı-aq, qaýlyǵa saı QR Eńbek jáne halyqty áleýmettik qorǵaý mınıstrligi jergilikti atqarýshy organdarmen birlesip erekshe kútimdi qajet etetin daýys berýshiler jáne saılaý ýchaskeleri týraly málimetterdi ózektendirý kerektigi aıtylǵan.

Jıyn barysynda QR Eńbek jáne halyqty áleýmettik qorǵaý mınıstrliginiń ókili málim etkendeı, búginde elimizde 600 myńnan astam múgedek jan bar.

Aıta keteıik, buǵan deıin OSK QR Pezıdenti saılaýy bıýlleteninde bolatyn barlyq kandıdatqa qarsy daýys berý múmkindigin túsindirgen edi.