Prezıdent saılaýynda elektrondy daýys berý júıesi qoldanylmaıtyn boldy
ASTANA. 4 aqpan. QazAqparat /Aıdar Ospanalıev/ - Elimizde 2011 jyldyń 3 sáýirinde ótetin kezekten tys Prezıdenttik saılaýda «Saılaý» avtomattandyrylǵan saılaý júıesi qodanylmaıdy.
Bul týraly búgin elordada Ortalyq saılaý komıssııasynyń otyrysynda atalmysh komıssııa tóraǵasy Qýandyq Turǵanqulov málim etti.
Onyń sózine qaraǵanda, qazirgi tańda elektrondy daýys berý júıesiniń tıimdiligin daýys berýshilerdiń barlyǵy moıyndaıdy deý qıyn. «Buryn ótken saılaý naýqandarynda saılaýshylardyń basym kópshiligi dástúrli qaǵaz bıýlletenimen daýys berdi. 2004 jyly elektrondy daýys berý júıesin saılaýǵa qatysqan saılaýshylardyń 7,2 paıyzy, 2005 jyly 5,8 paıyzy, 2007 jyly 2,2 paıyzy ǵana paıdalanǵan. Keıbir halyqaralyq sarapshylardyń, qazaqstandyq saıası partııalardyń, qoǵamdyq birlestikter men baıqaýshylardyń «Saılaý» júıesine saqtyqpen qaraıtyny da bizge belgili. «Saılaý týraly» zańnyń talaptaryna sáıkes, elektrondy saılaý júıesin paıdalaný tártibin Ortalyq saılaý komıssııasy belgileıdi. Sondyqtan jáne osy aıtylǵandardy eskere otyryp, bizde aldaǵy saılaýda bul júıeni paıdalanbaımyz degen pikir bar»,-dedi Q.Turǵanqulov.
