Prezıdent saılaýyna qatysatyn Islam Kárimovtiń qarsylastary anyqtaldy
TAShKENT. QazAqparat - Ózbekstannyń barlyq tórt partııasy prezıdent saılaýyna qatysatyn úmitkerlerdi anyqtady, dep jazdy gazeta.uz.
Ózbekstannyń «Adolat» sotsıal-demokratııalyq partııasynyń saıası keńesiniń plenýmy 16 qańtarda otyrysta prezıdent saılaýyna partııa saıası keńesiniń tóraǵasy Narımon Ýmarovtyń kandıdatýrasyn qoldady. Memleket basshysynyń laýazymyna úmitker 10 aqpanǵa belgilengen kýrýltaıda usynylady, dep habarlady partııa baspasóz qyzmetinen.
Ózbekstannyń «Mıllıı tıklanısh» demokratııalyq partııasy ortalyq keńesiniń búgin ótken plenýmynda prezıdenttikke úmitker retinde zańnamalyq palatadaǵy partııa fraktsııasynyń múshesi Akmal Saıdovtyń kandıdatýrasyn usynýdy maquldady. «Mıllıı tıklanısh» aqparattyq qyzmetiniń derekterine súıensek, Saıdov kandıdatýrasy 7 aqpanda partııa sezinde usynylady.
Kúndiz Ózbekstannyń basqa eki partııasy usynatyn kandıdattardyń esimi belgili boldy. Kásipkerler men isker adamdar qozǵalysy, lıberaldyq-demokratııalyq partııa prezıdenttikke qazirgi memleket basshysy Islam Kárimovtiń kandıdatýrasyn usynýǵa nıetti. Halyqtyq-demokratııalyq partııa prezıdenttikke partııa ortalyq keńesiniń tóraǵasy Hatamjon Ketmonovtyń kandıdatýrasyn usynbaq.
Ózbekstan prezıdentin saılaý 29 naýryzda ótedi. Prezıdenttikke úmitker usynýǵa tek saıası partııanyń ǵana quqyǵy bar, kandıdat partııa múshesi nemese partııada joq bolýy múmkin.
