Prezıdent saılaýyna daıyndyqty saılaý komıssııalarynyń 70 myńǵa jýyq múshesi qamtamasyz etedi
ASTANA. QazAqparvat - 2015 jyldyń 26 sáýirine belgilengen kezekten tys QR Prezıdentin saılaýǵa daıyndyq jáne ony ótkizý máseleleri Astanada saılaýdy uıymdastyrýshylar, saılaý komıssııalarynyń músheleri, saıası partııalar men memlekettik organdardyń ókilderi, baqylaýshylar men kandıdattardyń senimdi ókilderi qatysqan semınarda keńinen talqylandy, dep habarlady astana.gov.kz.
Belgili bolǵandaı, búgingi kúni elektoraldyq naýqan aıasynda QR Prezıdentine kandıdattardy usyný jáne tirkeý aıaqtaldy. Eń qarbalas kezeń - 26 naýryzdan 24 sáýirge deıingi 30 kúndik saılaý aldy úgit-nasıhat jumystary bastaldy. Saılaýdyń sheshýshi kúni jaqyndap keledi jáne ony ótkizý úshin barlyq jaǵdaı jasalǵan.
- Búgingi kúni úgit materıaldaryn ornalastyratyn oryndar anyqtaldy, kandıdattardyń saılaýshylarmen kezdesetin oryndarynyń tizimi bekitilgen, saılaýshylar tizimin jasaý aıaqtaldy, tizim saılaý ýchaskelerine atqarýshy organdarǵa bıylǵy jyldyń 5 sáýirinen keshiktirilmeı beriledi, - dedi Astana qalalyq saılaý komıssııasynyń tóraǵasy Igilik Jalbyrov óz sózinde.
- Bizdiń ortaq maqsatymyz - saılaý zańnamasy men jalpy moıyndalǵan halyqaralyq ustanymdarǵa saı ádil saılaý naýqanyn ótkizý, - dedi ol.
QR Ortalyq saılaý komıssııasynyń múshesi Tatıana Ohlopkovanyń aqparaty boıynsha, Prezıdent saılaýyn 224 aýmaqtyq jáne 9741 saılaý ýchaskesi komıssııalarynyń quramyna kiretin saılaý komıssııalarynyń 69 myń 755 múshesi qamtamasyz etedi. 5 sáýir kúni ýchaskelik saılaý komıssııalaryna saılaýshylar tizimi usynylady, 10 sáýir kúni bul tizimder saılaýshylarǵa tanystyrylady.
Halyqaralyq baqylaýshylardyń atalmysh saılaýaldy naýqandaǵy róli de mańyzdy. Olardyń jáne sheteldik BAQ ókilderiniń qatysýy ashyqtyq pen senim syılaıdy.
- 30 naýryzǵa sáıkes Ortalyq saılaý komıtetinde EQYU, TMD, ShYU jáne 19 memleketten 236 halyqaralyq baqylaýshy tirkelgen baqylaý júrgizý múmkindigine ıe. Baqylaýshylar saılaý naýqanynyń barlyq kezeńderine qatysa alady.
Halyqty aqparattandyrý maqsatynda ortalyq saılaý komıssııasy nasıhat jumysyn jalǵastyrýda. Atap aıtqanda, respýblıkalyq jáne aımaqtyq telearnalarda taqyryptyq beınerolıkter kórsetilýde, óńirlerde myńǵa jýyq bılbord ornatyldy, arnaıy eskertpeler men plakattar shyǵaryldy. Uıymdastyrýshylardyń aıtýynsha, munyń barlyǵy Qazaqstanda ótetin saılaý naýqanynyń tolyqtyǵy men jedeldigin aıqyndaıdy.
Eske sala keteıik, Astana qalasynyń ákimdigi naqty ýaqyt rejıminde óz saılaý ýchaskeńiz týraly aqparat alýǵa múmkindik jasaıdy. Saılaýshylar tizimin anyqtaý maqsatynda 55-66-55 telefony boıynsha Astana qalasy ákimdiginiń baılanys ortalyǵyna habarlasýǵa bolady. Málimetti táýlik boıy avtomatty rejımde JSN terý arqyly jáne jumys kúnderi saǵat 9.00 - 20.00 aralyǵynda, demalys nemese mereke kúnderi saǵat 10.00 - 20.00 aralyǵynda alýǵa bolady.
Saılaý ýchaskesin Astana qalasy ákimdiginiń «Elektrondy qyzmetter» veb-portalynyń e.astana.kz meken-jaıy boıynsha «Saılaý ýchaskesin izdeý» bóliminde nemese astana.gov.kz veb-portalynyń «Aqparattar bıýrosy» bólimi arqyly anyqtaýǵa bolady;
Astana turǵyndary barlyq suraqtar boıynsha myna mekenjaılarǵa habarlasa alady:
«Esil» aýdany - Qabanbaı batyr, 33, tel. 46-61-51, 78-06-83, 46-74-70;
«Saryarqa» aýdany - Saryarqa dańǵyly, 13, kab. № 311, tel. 55-66-48, 55-66-09, 55-74-88;
«Almaty» aýdany - Táýelsizdik dańǵyly, 7, tel. 36-23-99, 35-02-84, 35-45-27.
