Prezıdent saılaýyn shet memleketterden 532 baıqaýshy qadaǵalady – OSK

ASTANA. QazAqparat – Qarashada ótken QR Prezıdentin kezekten tys saılaýǵa halyqaralyq baıqaýshylar asa qyzyǵýshylyq tanytty. Bul týraly QR Ortalyq saılaý komıssııasynyń múshesi Shavkat Ótemisov málim etti, dep habarlaıdy QazAqparat tilshisi.

«20 qarashada ótken kezekten tys QR Prezıdenti saılaýy halyqaralyq baıqaýshylardyń asa qyzyǵýshylyǵyn týdyrdy. Ol týraly aımaqtarǵa shyqqan kezde de, saılaý qorytyndysy boıynsha ótken jıyndarda da aıtyldy. Bul biz úshin aıtýly abyroı. Bul Ortalyq saılaý komıssııasynyń jumysyna degen senim. Sonymen qatar syn da boldy. Synnyń bolǵanyn moıyndaý kerek. Qazaqstan saılaýdy ótkizý boıynsha shet elder jáne halyqaralyq uıymdarmen birlesip jumys isteýge asa mán beredi. Halyqaralyq baqylaýdyń bolýy saılaýdyń ashyq ári ádil ótýine oń septigin tıgizedi. Osy oraıda bıyl qyrkúıekte OSK janynan halyqaralyq baqylaý ınstıtýty ashyldy», - dedi Shavkat Ótemisov elordada ótip jatqan aýmaqtyq saılaý komıssııasy basshylaryna arnalǵan respýblıkalyq semınarda.

Onyń aıtýynsha, bıylǵy prezıdent saılaýy barysyn halyqaralyq uıymdar atynan 641 jáne shet memleketterden 532 baıqaýshy qadaǵalady.

Aıta keteıik, Astanada Ortalyq saılaý komıssııasynyń uıymdastyrýymen aýmaqtyq saılaý komıssııasynyń basshylaryna arnalǵan respýblıkalyq semınar ótip jatyr. Barlyq óńirden 300-ge jýyq adam qatysyp jatqan shara úsh kúnge sozylady.

Uıymdastyrýshylardyń aıtýynsha, semınardy ótkizýdegi maqsat – QR saılaý týraly zańnamasy aıasynda ony uıymdastyrýshylardyń kásibı quzyrettiligin arttyrý.