Prezıdent saılaýyn kezekten tys bıyl ótkizý - zaman talaby - Júrsin Erman
ALMATY. QazAqparat - Qazaqstanda Prezıdent kezekten tys, bıyl ótkizý qajettigin ýaqyttyń ózi týǵyzyp otyr. Bul zaman talaby. Búgin QazAqparat tilshisine bergen suhbatynda Qazaqstannyń eńbek sińirgen qaıratkeri, M. Maqataev atyndaǵy syılyqtyń eki márte ıegeri, Respýblıkalyq kitap murajaıynyń dırektory Júrsin Erman osylaı dedi.
Onyń aıtýynsha, qazirgi qalyptasqan jaǵdaıdy halyq ta jaqsy túsinedi.
«Nege Prezıdent saılaýyn bıyl ótkizý qajet? Munyń basty sebebi, ekonomıkalyq, qarjylyq daǵdarys. Ol búkil álemdi sharpyp keledi. Qazaqstan budan shet qala almaıdy. Saıasatkerlerdiń aıtýynsha ol kelesi jylǵa da sozylady. Demek, Prezıdent jáne Parlament saılaýyn aldaǵy jyly qatar ótkizý - qarjylyq qıyndyqtarǵa ákep soǵýy múmkin. Sol úshin Prezıdent saılaýyn bıyl ótkizýde úlken mán jatyr. Sońǵy 25 jylǵa jýyq ýaqyt ishinde Qazaqstan nebir daǵdarysty bastan keshti. Solardyń barlyǵynan halyqty kúızeltpeı, jurtty jutatpaı, qıynnan qıystyryp jol taýyp aman-esen alyp kele jatqan Elbasynyń qolyna el tizginin qaıta ustatsaq, kelesi jyly Parlament saılaýyn esh qınalmaı ótkizýge múmkindik týady. Budan eshqandaı bir quıtyrqy amal-aıla, tásil izdeýdiń qajeti joq», - dedi J. Erman.
Sonymen qatar, ol Memleket basshysynyń ústimizdegi jyly 11 aqpanda Úkimettiń keńeıtilgen otyrysynda iri mereıtoılar men sharalarǵa ketetin shyǵyndardy qysqartý týraly usynysy ár jerde burmalanyp, asyra silteýshilik áreketter oryn alyp jatqandyǵyna ókinish bildirdi.
«Elbasynyń shashpashylyqty doǵarý kerektigi týraly usynysy der kezinde aıtyldy", - dep atap ótti J. Erman.
