Prezıdent saılaýyn 10 myń qoǵamdyq baqylaýshy baqylaıdy
ASTANA. QazAqparat - Qazaqstanda ótetin kezekten tys prezıdenttik saılaýdy QR-daǵy saılaýdy baqylaý jónindegi Respýblıkalyq qoǵamdyq komıssııanyń (RQK) 10 myńǵa jýyq baqylaýshylary qadaǵalaıdy.
Bul týraly búgin QazAqparat tilshisine osy taqyryp boıynsha ótken semınar-trenıngte RQK múshesi Vladımır Telman habarlady.
«RQK tóraǵasy Qazaqstan Azamattyq alıansyn basqaratyn Nurlan Erimbetov ekenin bilesizder. Sonyń bazasynda biz komıssııa qurdyq. Negizinen, baqylaýshylar korpýsyn qurý aıaqtalyp qaldy. Astana shtaby tizimdi naqtylaýda. Biz baqylaýshylardyń barlyq saılaý ýchaskesinde bolýyn baqylaýǵa tyrysamyz. Bizdiń mindetimiz - saılaý týraly obektıvti kórinis alý. El boıynsha 9,5 myńǵa jýyq saılaý ýchaskeleri quryldy», - dedi ol.
Onyń aıtýynsha, kelesi aptada úsh úlken semınar ótkizý josparlanǵan. Jıyn barysynda baqylaýshy daýys berý kúninde ózin qalaı ustaý kerektigi, onyń naqty atqaratyn jumysy túsindiriledi.
«Baqylaýshylar - eriktiler, yntalylardan turady. Olar áleýmettik tájirıbe alady, árıne, biz de olardyń eńbegin baǵalap, alǵys hattar, sertıfıkattar berýge tyrysamyz. Jastarǵa bul óte baǵaly bolady dep oılaımyn», - dedi ol.
«Daýys berý kúnindegi saılaý komıssııasynyń qyzmeti» semınar-trenınginiń uıymdastyrýshysy RQK men Astana baqylaýǵa járdemdesý ortalyǵy.
Semınar barysynda baqylaýshynyń saılaý úrdisin baqylaý barysyndaǵy áreketin, onyń jumys kúni egjeı-tegjeıli qaralady, olarǵa yqtımal buzýshylyqtardy tirkeý jáne komıssııa shtabymen baılanysta bolý úshin nusqama taratyldy. Baqylaýshynyń saılaý ýchaskesinde ózin-ózi ustaý etıkasyna basa kóńil bólindi.
