Prezıdent saılaýy: J.Qalybaı nebary 600-den astam rastalǵan qol jınaı aldy
ASTANA. QazAqparat - QR Prezıdenttigine kandıdat retinde tirkelmek bolǵan Jarylqap Qalybaı ózin qoldaǵan ne bári 600-den astam rastalǵan qol jınaı aldy. Bul týraly búgin QR Ortalyq saılaý komıssııasynyń otyrysynda belgili boldy.
«Jarylqap Seıdláuly Qalybaıdy QR Prezıdenttigine kandıdat retinde tirkeýden bas tartylsyn. J.Qalybaıdyń 6 aýmaqtyq saılaý komıssııasynan hattamalary kelip tústi. Ol ózine qoldaý bildirgen 600-den astam rastalǵan qol jınapty. Sonymen qatar kandıdat pen onyń jubaıynyń tabysy men múlki týraly deklaratsııany tapsyrǵandyǵy jóninde salyq organdarynyń anyqtamasy joq. Sosyn saılaý jarnasyn engizgendigin kýálandyratyn qujattardy bizge tapsyrmady. Búgin bizge ózinen ótinish tústi», - dedi kandıdatty tirkeýden bas tartý týraly OSK qaýly jobasyn tanystyrǵan QR Ortalyq saılaý komıssııasynyń hatshysy Baqyt Meldeshev.
Sonymen qatar ol kandıdattyń ótinishin de oqyp berdi. Onda: «Men Jarylqap Qalybaı búginnen bastap 2015 jyldyń 26 sáýirinde ótetin QR Prezıdenti saılaýyna úmitker retinde qatysýdan óz erkimmen bas tartamyn», - delingen.
QR OSK músheleri qaýly jobasyn biraýyzdan maquldady.
