Prezıdent saılaýy zańnama talaptaryna saı ótkizildi - Serik Aqylbaı

NUR-SULTAN. QazAqparat - 9 maýsymda ótken Prezıdent saılaýy kezinde Qazaqstannyń barlyq óńirlerindegi saılaý ýchaskelerinde 3 myńǵa tarta zańger jumys júrgizgen. Bul týraly elordada ótken «Saılaý 2019: Azamat jáne saılaý quqyǵy» dóńgelek ústelinde Qazaqstan zańgerler odaǵynyń tóraǵasy Serik Aqylbaı aıtyp berdi, dep habarlaıdy QazAqparat tilshisi.

«Zańgerler odaǵynyń negizgi mindeti - saılaýǵa qatysatyn saılaýshylardy quqyqtyq turǵyda aǵartý. QR Prezıdentiniń kezekten tys saılaýyn ótkizý týraly jarııalanǵan sátten bastap «Zańgerler ádil saılaý úshin» respýblıkalyq qoǵamdyq birlestigi saılaý protsesiniń árbir kezeńi boıynsha baspasóz máslıhattaryn ótkizdi. Zańgerler saılaý jarııalanǵannan bastap kandıdattardy usyný jáne tirkeý sátinen, saılaý aldyndaǵy úgit júrgizýden tynyshtyq kúnine deıin barlyq kezeńde quqyqtyq túsinikteme berip otyrdy», - dedi Serik Aqylbaı.

Qazaqstan zańgerler odaǵynyń tóraǵasy zańgerler saılaýdyń barlyq kezeńine quqyqtyq baǵa bergenin tilge tıek etti.

«Osy kezeńde zańgerler odaǵy bizdiń saılaýshylardy alańdatqan suraqtar boıynsha bes aqparattyq bıýlleten shyǵardy. Zańgerler odaǵy men onyń óńirlik ókildikteri tańerteńnen bastap saılaý ýchaskelerinde jumys júrgizip, azamattarǵa keńes berip, olardyń quqyqtaryn túsindirip berdi. Zańgerlerimizdiń bári respýblıkanyń túkpir-túkpirinen belsendi jumys istedi. 17 óńirden 3 myń zańger saılaý ýchaskelerinde eńbek etti. Bizdiń óńirlerdegi ókildikterdiń málimeti boıynsha, jalpy, prezıdent saılaýy saılaý zańnamasynyń talaptaryna saı ótkizildi», - dedi Serik Aqylbaı.

Eske sala keteıik, keshe jańadan saılanǵan Qasym-Jomart Toqaev Qazaqstan Respýblıkasynyń Prezıdentin ulyqtaý rásiminde halqyna adal bolýǵa ant bergen bolatyn.