Prezıdent saılaýy: Túrkistan oblysynda 1 mıllıonnan astam adam daýys beredi
Túrkistan oblysy boıynsha 919 saılaý ýchaskesi bar. Onyń 50-i oblys ortalyǵynda ornalasqan. Sońǵy málimetterge sáıkes, oblysta 1 163 860 saılaýshy daýys beredi. Qazir óńirde saılaýshylar sanyn naqtylaý boıynsha jumys jalǵasyp jatyr. Bul týraly Túrkistan oblystyq saılaý komıssııasynyń tóraǵasy Álibek Ómirálıev aıtty.
Tóraǵanyń aıtýynsha, naýqandy baqylaýǵa 2 229 komıssııa múshesi bekitilgen. Olar ýchaskelerdiń tehnıkalyq jabdyqtalýyn, sapaly ǵalamtormen qamtylýyn tekserýde.
«Qazir saılaý komıssııasynyń múshelerin oqytý men daıyndyǵyna basa nazar aýdarylyp otyr. Saılaýdyń ádil ótýi - osy saılaý ýchaskeleriniń múshelerine, olardyń biliktilikterine baılanysty. Sol úshin oqytý jumystaryna jiti kóńil bólip otyrmyz», - dedi oblystyq saılaý komıssııasynyń tóraǵasy.
Sondaı-aq saılaýda múgedektigi bar azamattar úshin jaǵdaı jasalady. Qazirgi tańda oblysta 97 101 múgedektigi bar azamat turady. Olardyń 60 paıyzy saılaýda daýys berý quqyǵyna ıe. Múmkindigi shekteýli azamattarǵa qolaıly jaǵdaı jasaý úshin ýchaskelerde arnaıy buryshtar ornatylǵan. Odan bólek, 36 ınvataksı, 42 áleýmettik taksı, estý qabiletteri nashar azamattar úshin 101 ymdaý mamany qyzmet kórsetedi.
Odan bólek, saılaý kúni polıtsııa departamentiniń jeke quramy da qarqyndy jumys atqarmaq. Naýqan kezinde quqyqbuzýshylyqtyń aldyn alý maqsatynda 1 830 polıtsııa qyzmetkeri jumyldyrylady.
