Prezıdent saılaýy: Sheteldik baıqaýshylar 20-ǵa jýyq brıfıng ótkizedi

ASTANA. QazAqparat – 20-21 qarasha kúnderi sheteldik baıqaýshylar elimizdegi prezıdent saılaýyna oraı 20-ǵa jýyq brıfıng ótkizedi. Bul týraly QR Syrtqy ister mınıstriniń orynbasary Roman Vasılenko aıtty, dep habarlaıdy QazAqparat tilshisi.

«17-21 qarasha aralyǵynda Astana jáne Almaty qalalarynda «Halyqaralyq baqylaýshylar men sheteldik BAQ ókilderine járdemdesý ortalyqtary» ashyldy. Bul ortalyqtar búkil qajetti tehnıkalyq jabdyqtarmen qamtamasyz etildi jáne Qazaqstanǵa saılaýdy baıqaýǵa kelgen baıqaýshylar brıfıngter men baspasóz konferentsııasy formatynda óz pikirin bólise alatyn alań retinde quryldy», - dedi Roman Vasılenko Ortalyq saılaý komıssııasynda ótken brıfıngte.

Onyń atap ótýinshe, búginnen bastap baıqaýshylar atalǵan ortalyqtarda baspasóz máslıhatyn ótkizip, elimizdegi saılaýǵa qatysty pikirin bólise alady.

20-21 qarasha kúnderi atalǵan ortalyq alańdarynda halyqaralyq uıymdar men shet memleket baıqaýshylarynyń qatysýymen 20-ǵa jýyq brıfıng ótedi dep josparlanǵan.