Prezıdent saılaýy: «Qazaqstan Team» jastary Toqaevtyń kandıdatýrasyn usyndy

ASTANA. QazAqparat – «Qazaqstan Team» qoǵamdyq birlestigi kezekten tys prezıdent saılaýyna kandıdat retinde Qasym-Jomart Toqaevty usyndy, dep habarlaıdy QazAqparat tilshisi.

Astanada «Qazaqstan Team» jastar qoǵamdyq respýblıkalyq birlestiginiń otyrysy ótti. Atalǵan jıynda birlestik músheleri 20 qarashada ótetin prezıdent saılaýyna Qasym-Jomart Toqaevtyń kandıdatýrasyn usyndy.

«Biz Memleket basshysyn qoldaýmen qatar, 20 qarashada ótetin prezıdent saılaýyna Qasym-Jomart Toqaevtyń kandıdatýrasyn usynamyz. Sebebi bizdiń uıym Memleket basshysy usynǵan jáne iske asyp jatqan reformalar paketin qoldaıdy. Bizdiń birlestik músheleri túrli salada eńbek etedi jáne Prezıdent reformasy olardyń bárine qatysty. Bizdiń oıymyzsha Qasym-Jomart Toqaev – laıyqty kandıdat», - dedi «Qazaqstan Team» jastar qoǵamdyq birlestiginiń jetekshisi Oljas Súleımenov.

Onyń aıtýynsha, atalǵan qoǵamdyq uıymnyń 200-den astam múshesi bar.

«Bizdiń birlestiktiń maqsaty – ıntellektýaldy jastardyń basyn qosyp, el damýyna úles qosý. Birlestik músheleriniń deni kásipkerler jáne túrli sala sarapshylary. Biz qoǵamǵa paıdaly is-sharalar ótkizemiz. Sonyń biri «30 qaıyrymdy is» qaıyrymdylyq aktsııasy», - deıdi ol.

Buǵan deıin ulttyq volonterlik jelisi prezıdent saılaýyna Qasym-Jomart Toqaevtyń kandıdatýrasyn usynǵan edi.