Prezıdent saılaýy: Máslıhat depýtattarynyń birlestigi Qasym-Jomart Toqaevtyń kandıdatýrasyn usyndy

ASTANA. QazAqparat – Elimiz boıynsha máslıhattar depýtattarynan quralǵan respýblıkalyq qoǵamdyq birlestik QR Prezıdenti saılaýyna óz kandıdatýrasyn usyndy, dep habarlaıdy QazAqparat tilshisi.

Búgin Astanada Qazaqstan máslıhattarynyń depýtattary birlestiginiń otyrysy ótti.

Atalǵan jıynǵa elimizdiń barlyq óńirinen máslıhat depýtattary men ókilderi qatysty.

Birlestik músheleri 20 qarashada ótetin QR Prezıdenti saılaýyna kandıdat retinde Memleket basshysy Qasym-Jomart Toqaevty usyndy.

«Qarasha aıynda elimiz úshin mańyzdy naýqan, Prezıdent saılaýy ótedi. Qazir kandıdattardy usyný, tirkeý protsesi júrip jatyr. Qazaqstannyń aldaǵy 7 jyl ishinde damýy sol saılaýdan keıin aıqyndalady. Bizdiń birlestik aqyldasa kele, biraýyzdan 20 qarashada ótetin QR Prezıdenti saılaýyna kandıdat retinde Qazaqstan Respýblıkasynyń qazirgi Prezıdenti Qasym-Jomart Toqaevty usynamyz. Qazir álemdegi geosaıası ahýaldy barshańyz bilip otyrsyzdar. Osy oraıda biz el birligin saqtap, Memleket basshysy júrgizip kelgen saıasatty qoldap, jańa Qazaqstandy birge qurýymyz qajet», - dedi Shymkent qalasy máslıhatynyń hatshysy Bahadúr Narymbetov.

Onyń aıtýynsha, aýmaly-tókpeli zamanda Memleket basshysynyń el tutastyǵy men táýelsizdigin saqtaý qalýda tájirıbesi mol.

«Bizdiń birlestik respýblıka boıynsha máslıhat depýtattarynan qurylǵan. Halyqpen kezdesý kezinde depýtattar aldynda túrli máseleler kóteriledi. Osyǵan oraı halyqtyń qalaýy da Qasym-Jomart Toqaevqa túsip otyr. Halyq Prezıdent retinde Qasym-Jomart Toqaevty kórgisi keledi», - deıdi ol.