Prezıdent saılaýy: M.Maqataevtyń qaı kezeńde ómir súrgenin bilmeıtin úmitker synnan súrindi
Bul týraly búgin atalǵan komıssııanyń tóraǵasy Myrzataı Joldasbekov málim etti. «B.Estemesov jazba jumysyna «Nurly aqyl, ystyq qaırat» taqyrybynda shyǵarma jazdy. Ókinishtisi, taqyryp ashylmaǵan. «Nurly aqyl, ystyq qaırat» degen uǵymdardyń mán-maǵynasyn avtor tolyq túsinbegen. Jumys óte saýatsyz jazylǵan. Barlyq qatelerdiń sany elý. Emle qateleriniń sany 27, tynys belgilerinen jiberilgen qate - 19, stıldik qate - 4-eý», - dedi komıssııa tóraǵasy. Onyń atap ótýinshe, mátin oqý synaǵynda úmitker Muqaǵalı Maqataevtyń óleńderin oqyǵan.«Átteń, óleńdi oqı almady. Men «Muqaǵalı Maqataev qaı kezde ómir súrgen», dep suraq qoıdym, úmitkerimiz "XIX ǵasyrda ómir súrgen", dedi. Bul kisi kitap oqymaǵanyn moıyndady. Tarıh pen ádebıtetti de oqymaǵan eken. Ekinshi tapsyrmaǵa da qanaǵattanbadyq», - dedi M.Joldasbekov. Úmitkerdiń úshinshi tapsyrmada «Til taǵdyry - el taǵdyry» degen taqyrypta sóılegenin aıtqan M.Joldasbekov: «Bul taqyryptyń da mán-maǵynasyn asha almady. «Qazaq eliniń taǵdyry men til taǵdyry burynnan qalyptasyp keledi, jan-jaqtan kelip, til bilsek degen azamattar kóp», degen eki aýyz sóz aıtty. Onyń ústine, B.Estemesovtiń óz qolymen jazǵan ómirbaıanynda 10 qate júr. Baqtııar Óksikbaıuly Estemesov qazaq tilin erkin meńgermegen degen qorytyndyǵa kelip otyrmyz", - dedi komıssııa tóraǵasy.
