Prezıdent saılaýy halyqaralyq mindettemelerge saı júzege asyryldy – Nurlan Ábdirov

ASTANA. QazAqparat – 20 qarashada ótken Prezıdent saılaýy ulttyq zańnama men halyqaralyq mindettemelerge saı júzege asyryldy. Bul týraly QR Ortalyq saılaý komıssııasynyń tóraǵasy Nurlan Ábdirov aıtty, dep habarlaıdy QazAqparat tilshisi.

«Saılaýdy ázirleý men ótkizýdi uıymdastyrý Qazaqstan Respýblıkasynyń ulttyq zańnamasyna jáne halyqaralyq mindettemelerine, ashyqtyq jáne aıqyndyq qaǵıdattaryna sáıkes júzege asyryldy. Ýchaskelerde múgedektigi bar azamattardyń daýys berýi úshin qajetti jaǵdaılar jasaldy. Kórý qabileti nashar azamattar úshin alǵash ret saılaý bıýlletenderine braıl qarpimen trafaretter jasalyp, barlyq saılaý ýchaskeleri olarmen qamtamasyz etildi», - dedi ol búgin OSK otyrysynda.

Onyń atap ótýinshe, daýys berý kúni saılaý rásimderin kandıdattardyń 11 myńnan astam senim bildirgen adamy, 45 myńnan astam ulttyq jáne halyqaralyq baıqaýshylar baıqady.

«Olardyń qyzmeti saılaýshylar men saılaý protsesine qatysýshylardyń quqyqtaryn qamtamasyz etýge oń yqpal etti. Baıqaýshylar men sarapshylar saılaýshylardyń óz azamattyq ustanymy men elektorattyq belsendiligin tanytyp qana qoımaı eldiń múddesi men bolashaǵy jolynda saıası jaýapkershilik tanytqanyn, sondaı-aq saıası naýqannyń joǵary deńgeıde uıymdastyrylǵanyn, saılaý komıssııalary músheleriniń kásibı daıarlyǵyn, tehnologııalyq jańalyqtardyń engizilgenin jáne saılaý ýchaskeleriniń tıisinshe qamtylǵanyn erekshe atap kórsetýde», - dedi Nurlan Ábdirov.

Aıta keteıik, 20 qarashada ótken kezekten tys saılaý barysynda Qasym-Jomart Toqaevqa 6 mln 456 myń 392 saılaýshy nemese olardyń 81,31 paıyzy daýys berdi.

Sondyqtan búgin Ortalyq saılaý komıssııasynyń otyrysynda halyq saılaǵan Qasym-Jomart Kemeluly Toqaevty Qazaqstan Respýblıkasynyń prezıdenti retinde tirkedi jáne zańnamada belgilengen tártippen saılanǵan Memleket basshysyna tıisti kýálik tapsyrylatyn bolady. Al Qasym-Jomart Kemeluly Prezıdent retinde 26 qarashada ant beredi.