Prezıdent saılaýy: H.Qoja-Ahmet «Konstıtýtsııa - turaqty damý kepili» taqyrybynda shyǵarma jazýda

ASTANA. QazAqparat - Búgin QR Prezıdenttigine kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııa aldynda prezıdenttikke ózin-ózi usynǵan Hasen Qoja-Ahmet synaq tapsyrýda.

«Lıngvıstıkalyq komıssııaǵa qazaq tilinen emtıhan tapsyrý úshin Hasen Kárimjanuly Qoja-Ahmet myrza keldi. 1949 jyly Almaty oblysynda dúnıege kelgen, bilimi joǵary, jýrnalıst. Almaty qalasynda turady. Ózin-ózi usynǵan. Qazaq sport jáne týrızm akademııasy prezıdentiniń keńesshisi bolyp qyzmet isteıdi», - dedi kandıdatty tanystyrǵan komıssııa tóraǵasy Myrzataı Joldasbekov.

Komıssııa tóraǵasy emtıhan tapsyrýshyǵa úsh kezeńmen ótetin synaqtyń erejesin egjeı-tegjeıli túsindirdi.

Osydan keıin H.Qoja-Ahmetke «Konstıtýtsııa - turaqty damý kepili» taqyryby túsip, ol eki bettik shyǵarma jazýǵa kiristi.

Aıta keteıik, Hasen Kárimjanuly Qoja-Ahmet 1949 jyly 9 tamyzda Almaty oblysy Aqsý aýdany Mataı kentinde dúnıege kelgen. Qazaqstan Jazýshylar odaǵynyń múshesi, jýrnalıst-pýblıtsıst, sazger, qoǵam qaıratkeri. 1972 jyly Almaty mýzykalyq ýchılışesin, 1993 jyly QazMUÝ-dy támamdaǵan.

1990-1993 jyly «Jeltoqsan» qoǵamdyq qozǵalysyn basqardy. Keńestik totalıtarlyq júıege, ult saıasatyndaǵy teńsizdikterge qarsylyq bildirip, 1977 jáne 1987 jyly saıası aıyppen sottaldy.

Pýblıtsıstıka salasynda qalam tartyp, 200-den astam maqala jazdy. 300-ge tarta án men mýzykalyq aspaptarǵa arnalǵan 50 shaqty shyǵarmanyń avtory.