Prezıdent saılaýy - bolashaq úshin jasalǵan tarıhı sheshim - Nurǵısa Dáýeshov
Qurmanǵazy atyndaǵy Qazaq memlekettik akademııalyq halyq aspaptar orkestriniń dırektory, Qazaqstannyń eńbek sińirgen qaıratkeri Nurǵısa Dáýeshov osyndaı pikir bildirdi, dep habarlaıdy QazAqparat tilshisi.
Ol Prezıdent saılaýyn mezgilinen buryn ótkizý týraly sheshimdi qoldaıtynyn jetkizdi.
«Elimiz Táýelsizdikke qol jetkizgen 28 jyl ishinde Tuńǵysh Prezıdentimiz - Elbasy Nursultan Nazarbaevtyń arqasynda elimizdiń ekonomıkasy men áleýmettik jaǵdaıy qarqyndy damydy, bilim men mádenıet salasy da zor tabystarǵa jetken biregeı turaqty memleket bolyp qalyptasty. Nursultan Nazarbaev Prezıdent laýazymynan óz erkimen bas tartyp, ókilettigin toqtatý jóninde sheshim qabyldaǵannan keıin, Qazaqstan Respýblıkasy Konstıtýtsııasynyń 48-babynyń 1-tarmaǵyna sáıkes, bul jaýapty mindetti Parlament Senatynyń tóraǵasy oryndaıdy. Ol osy qyzmetti jańa Prezıdent saılanǵanǵa deıin atqarady. Sol sebepti qazirgi ýaqyttaǵy Qazaqstan Respýblıkasynyń Prezıdenti Qasym-Jomart Toqaevtyń búgingi, ıaǵnı 2019 jyldyń 9 sáýirindegi Qazaqstan halqyna úndeýinde aıtqan Prezıdent saılaýyn mezgilinen buryn ótkizý týraly sheshimin qoldaımyn», - dedi Nurǵısa Dáýeshov.
Óner salasynyń ókili Prezıdenttiń bul sheshimi elimizdiń bolashaqtaǵy baǵyt baǵdary úshin asa mańyzdy ekenin jetkizdi.
«Qasym-Jomart Kemeluly Toqaevtyń bul sheshimi elimizdegi turaqtylyqty saqtap qalý úshin jáne beıbitshilik pen baqytty bolashaq úshin jasalǵan tarıhı sheshim dep oılaımyn», - dedi ol.
Esterińizge sala keteıik, Aqorda osyǵan deıin Memleket basshysy Qasym-Jomart Toqaevtyń Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyǵyn jarııa etti.
Jarlyqqa sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótedi.
Qasym-Jomart Toqaev saılaýdyń ashyq, ádil ótetinine kepildik beretinin aıtty.
«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - dedi Qasym-Jomart Toqaev.
