Prezıdent saılaýy: Á.Qusaıynov «El men jer taǵdyry» taqyrybynda shyǵarma jazýǵa kiristi
«Sizderdiń aldaryńyzǵa Ábilǵazy Qalıaqparuly Qusaıynov myrza memlekettik tilden emtıhan tapsyrý úshin kelip otyr. 1952 jyly Qaraǵandy oblysynda dúnıege kelgen. Bilimi - joǵary. Injener-mehanık, saıasattanýshy. Astana qalasynda turady. Ózin-ózi usynǵan. Qazir Qazaqstan Respýblıkasynyń kásipodaqtar federatsııasynyń tóraǵasy bolyp jumys isteıdi», - dedi kandıdatty tanystyrǵan komıssııa tóraǵasy Myrzataı Joldasbekov.
Komıssııa tóraǵasy emtıhan tapsyrýshyǵa úsh kezeńmen ótetin synaqtyń erejesin ejeı-tegjeıli túsindirdi.
Osydan keıin Á.Qusaıynov «El men jer taǵdyry» taqyrybyn tańdap, 2 bettik shyǵarma jazýǵa kiristi.
Á.Qusaıynov 1952 jyly 6 aqpanda Qaraǵandy oblysy Telman aýdanynyń Maıózek kentinde týǵan. Qaraǵandy polıtehnıkalyq ınstıtýtyn, Reseı basqarý akademııasyn bitirgen. Mamandyǵy boıynsha - ınjener-mehanık, saıasattanýshy. Eńbek jolyn Kýznetsk metallýrgııalyq kombınatynda beton quıýshy bolyp bastady. «Qaraǵandykómir» kombınatynda burǵyshy, shahta kenshisi bolyp jumys jasady. Qaraǵandy oblysynyń memlekettik basqarý organdarynda basshylyq qyzmetter atqardy.
Sonymen qatar ol QR Parlamenti Senatynyń depýtaty, Parlament Senaty tóraǵasynyń orynbasary bolyp saılanǵan. QR Kólik jáne kommýnıkatsııa mınıstrligi Avtomobıl joldary komıtetiniń tóraǵasy, Kólik jáne kommýnıkatsııa vıtse-mınıstri, Ekonomıka, ındýstrııa jáne saýda vıtse-mınıstri, QR Indýstrııa jáne saýda mınıstrligi Tehnıkalyq retteý jáne metrologııa komıtetiniń tóraǵasy, Kólik jáne kommýnıkatsııa birinshi vıtse-mınıstri bolyp jumys jasady. QR Kólik jáne kommýnıkatsııa mınıstrliginiń jaýapty hatshysy boldy. 2009 jylǵy naýryzdan 2011 jylǵy sáýirge deıin QR Kólik jáne kommýnıkatsııa mınıstrligin basqardy. Al 2011 jyldan 2013 jylǵa deıin Qaraǵandy oblysynyń ákimi boldy. Qazirgi ýaqytta - QR Kásipodaqtar federatsııasynyń tóraǵasy. «Qurmet» ordenimen, sondaı-aq medaldarmen marapattalǵan.
