Prezıdent saılaýy-2022: Almatylyqtar belsendi túrde daýys bere bastady
Almatyda kezekten tys prezıdenttik saılaýǵa usynylǵan úmitkerlerge daýys berý bastaldy. Búgin qaladaǵy ýchaskeler ashylmaı jatyp, óz tańdaýyn jasaýǵa kelgen almatylyqtardyń qarasy qalyń boldy.
Almatyda alǵashqy saılaý ýchaskesi tańǵy saǵat 6.00-de ashyldy. Al daýys berý saılaý zańnamasynda bekitilgen tártip boıynsha saǵat 7.00-de bastaldy. El tarıhyndaǵy eleýli oqıǵaǵa beıjaı qaramaı, óz daýsyn berýge kelgen qala turǵyndarynyń kóńil-kúıi óte jaqsy.
Solardyń biri Dına Dıveeva.
«Búgin erekshe kún. QR Prezıdent saılaýy. Bul saıası oqıǵa. Bul bizdiń bolshaǵymyz. Men kesheli beri atalǵan naýqanǵa daıyndaldym. Almatyda jaýyn jaýyp tur, soǵan qaramastan eń birinshi bolyp saılaý ýchaskesine kirdim. Sonyń arqasynda syılyqqa ıe boldym»,- deıdi Almaty turǵyny.
№ 254 saılaý ýchaskesi komıssııasynyń tóraǵasy Baqytjamal Ospanovanyń aıtýynsha, saılaýshylarǵa barlyq jaǵdaı jasalǵan.
«Bizdiń saılaý ýchaskesinde 1799 adam tirkelgen. Jalpy, 1817 bıýlleten berildi. Tórt adam esepten shyǵarý kýáligin aldy. Almatylyqtar tańmen talasa kelip, belsendi atsalysyp jatyr. 10-nan astam baıqaýshy jumys isteýde. Barlyq saılaý normalaryn qatań qadaǵalaımyz», - deıdi Baqytjamal Ospanova.
