Prezıdent saılaý týraly: Partııalar saıası básekelestiktiń joǵary deńgeıin kórsetedi dep senemin

NUR-SULTAN. QazAqparat – Búgin Ulttyq qoǵamdyq senim keńesiniń tórtinshi otyrysynda Prezıdent Qasym-Jomart Toqaev aldaǵy parlamenttik saılaýǵa qatysty pikir aıtty, dep habarlaıdy QazAqparat tilshisi.

«Parlamenttik saılaý datasyn jarııalaý arqyly biz resmı túrde kezekti saılaý tsıkline aıaq bastyq. Aldaǵy saılaý Qazaqstanda turaqty demokratııalyq ınstıtýttardy dáıekti túrde qurýda mańyzdy kezeń bolady. Saılaý Konstıtýtsııada bekitilgen merzimde ótedi», - dedi Prezıdent.

Osy oraıda Memleket basshysy barlyq partııalarda saılaýǵa jaqsy daıyndalý úshin ýaqyt jetkilikti bolǵanyn atap ótti.

«Barlyq partııalar saıası básekelestiktiń joǵary deńgeıin kórsetip, eldiń damýynyń ózekti kún tártibin usynady dep senemin. Bizde bir maqsat – halyqtyń amandyǵy men bizdiń ortaq shańyraǵymyzdyń gúldenýi», - dedi Qasym-Jomart Toqaev.