Prezıdent saılaý ótkizý týraly durys ári zańdy sheshim qabyldady - R. Sárpekov
ASTANA. 1 aqpan. QazAqparat /Qanat Mámetqazyuly/ -Prezıdent kezekten tys saılaý ótkizý týraly durys ári zańdy sheshim qabyldady. Búgin QR Parlamenti Májilisi kezekten tys otyrysynda «QR keıbir Konstıtýtsııalyq zańdaryna tolyqtyrýlar men ózgerister engizý týraly» zań jobasyn jumysqa alǵan bolatyn. Osy máselege qatysty jýrnalısterge bergen suhbatynda depýtat Ramazan Sárpekov osylaı málim etti.
«Keshe Elbasy Konstıtýtsııalyq keńestiń sheshimine baılanysty óziniń oı-pikirin halyqqa jetkizdi. Bul rette Memleket basshysy 5 mln.-nan astam adam resmı qoldaǵan halyqtyń, onyń syrtynda Parlamenttegi depýtattardyń, eldegi demokratııalyq kúshterdiń bastamasyn eskere otyryp kezekten tys saılaý ótkizý týraly usynys tastady. Soǵan oraı, Májilistiń qorjynyna «QR keıbir konstıtýtsııalyq zańdarǵa ózgerister men tolyqtyrýlar engizý týraly» zań jobasy kelip tústi. Biz ony óndirisimizge ala otyryp, ol boıynsha jumys toptary qurylyp, olar ózgeristerdiń ulttyq zańnamaǵa, Ata zańǵa qaıshylyqtaryn salystyryp qaraıtyn bolady», - dedi R. Sárpekov. Onyń paıymdaýynsha, Prezıdenttiń kezekten tys saılaý ótkizý týraly usynysy durys ári ádil sheshim boldy. «Bir jaǵynan 5 mln.-nan astam saılaýshynyń usynysyn elemeý durys bolmas edi. Budan bólek, Prezıdent Konstıtýtsııalyq keńestiń memleket ómirindegi asa mańyzdy másele bolyp tabylatyn referendým ótkizýdi joqqa shyǵarmaıtynyna da nazar aýdardy. Alaıda, keıbir qaıshylyqtarǵa qatysty Elbasy saılaý ótkizýdi usynyp, zańdy sheshim qabyldady», - dedi R. Sárpekov.
Esterińizge sala keteıik, Májilis óndiriske alǵan zań jobasymen «QR saılaý týraly» jáne «QR Prezıdenti týraly» zańdarǵa ózgerister engiziledi. Atap aıtqanda, bul jobada kezekten tys Prezıdenttik saılaý ótkizý máselesi qarastyrylǵan.
