Prezıdent saıası partııalardyń kadrlyq rezervin jasaqtaýdy usyndy

ASTANA. QazAqparat – Úkimettegi jáne aımaqtardaǵy basshylyq qyzmetterge túrli partııa ókilderin tartqan jón. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Men Premer-Mınıstrdiń kandıdatýrasyn saılaýda jeńiske jetken partııa Memleket basshysyna usynýǵa quqyly dep aıttym. Osy rette, saıası jaýapkershilik te sol partııaǵa júkteledi. Bul tásil «kúshti Prezıdent – yqpaldy Parlament – esep beretin Úkimet» tujyrymdamasyna saı keledi», - dedi Memleket basshysy.

Qasym-Jomart Toqaev Úkimet áleýmettik-ekonomıkalyq reformalardy iske asyrýǵa tıistigin basa aıtty.

«Bolashaqta Úkimettegi jáne aımaqtardaǵy basshylyq qyzmetterge túrli partııa ókilderin tartqan jón. Ol úshin saıası partııalardyń kadrlyq rezervin jasaqtaýdy usynamyn. Sondaı-aq, ókildi jáne atqarýshy bıliktiń qarym-qatynasy jańasha sıpatqa ıe bolady», - dedi Prezıdent.