Prezıdent saýda nysandaryna «Nur» sózin qosýǵa qatysty pikir bildirdi
Búgin Memleket basshysy Aqordada 8 naýryz - Halyqaralyq áıelder kúnine oraı áıelder qaýymymen kezdesti. Olardyń ishinde Batys Qazaqstan oblysynan kelgen "Nur" sharýa qojalyǵynyń jetekshisi Svetlana Máýteeva da boldy. Kásipker óz sharýashylyǵynyń ataýyn aıtqanda Prezıdent onyń sózin bólip: "Ataýy jaqsy eken. Biraq qazir bári "Nur"-dan bastalady dep, synǵa alyp jatady. Sonda ony menimen baılanystyryp jatady (kúldi). Men ataýyn solaı qoısyn dep aıtpaımyn ǵoı", - dedi N.Nazarbaev.
Kásipker áıeldiń sózine qaraǵanda, osydan alty jyl buryn arnaıy bilimi bolmasa da, memlekettik baǵdarlama aıasynda 200 mıllıon teńgege nesıe aldy. "Shynymdy aıtsam, qorqynysh boldy. Búginde orta jáne shaǵyn bızneske jasalyp jatqan qoldaýdyń arqasynda biraz jetistikterge jettik. Asyl tuqymdy maldy ósiremiz. Jylqy, qoı, eshki, taýyq - bári bar", - dep atap kórsetti S.Máýteeva.
Aıta keteıik, Aqordada ótken kezdesýde N.Nazarbaev barsha analar men qyz-kelinshekterdi 8 naýryz - Halyqaralyq áıelder kúnimen quttyqtady.
"Ananyń qudireti sheksiz. "Onyń aldynda búkil dúnıe bas ıedi" dep tegin aıtylmasa kerek. Erte zamanda jaýlasqan jurttyń ortasyna ana aq jaýlyǵyn tastaǵan kezde soǵys toqtalyp, bitimge keletin bolǵanyn bilemiz. Dástúrimizdi barynsha saqtap kele jatqan biz áıel zatyn ásirese qadirleıtin xalyqpyz. Qazaq ulty qyz balany ár ýaqytta alaqanyna salyp, aıalap otyratyn. Bul saltymyz otbasy úshin buzylmas zańdylyqqa aınalyp keledi. "Ana" degen qasterli sózdi estigende tebirenbeıtin júrek joq, tolqymaıtyn kóńil bolmaıdy", - deıdi N.Nazarbaev.
Sondaı-aq, jıynda Memleket basshysy kópbalaly otbasylarǵa kómek berý máselesin de qozǵady.
